Traysikol vs van, pito naangol
CEBU, Philippines — Pito ka mga indibidwal ang naangol sa nahitabong disgrasya sa Barangay Naalad, dakbayan sa Naga pasado alas 11 sa buntag, kagahapon, Domingo, Oktubre 19, 2025.
Ang nalambigit sa disgrasya mao Mitsubishi Versa Van nga gimaneho ni Quiño Ryboy Monsuller, 32, nagpuyo sa Lawaan 1, Talisay City ug Kawasaki 126 motorcycle nga naay sidecar ug gimaneho ni Ronelo Geraldes, 27, taga Barangay Alpaco, siyudad sa Naga.
Sakay ni Geraldes sila si Evangeline Bonghanoy, 49 anyos, minyo, taga Pangdan, City of Naga; usa ka 16 anyos nga batang babaye, residente sa Pangdan, siyudad sa Naga; Neresa Presillas, 38 anyos, minyo, taha Pangdan; Joemar Presilla, 42 anyos, minyo, resident sa Pangdan; Adrian Survilla Tabay, 31 anyos, dunay kaipon, molopyo sa Pangdan; ug Christy Alivo, 35 anyos, nagpuyo sa Pangdan.
Sa impormasyon sa City of Naga Police Station ang mga van ug motorsiklo nagbiyahe sa managlahi nga direksyon.
Ang van gikan sa Barangay Mainit ug paingon sa Simala, Lungsod sa Sibonga samtang motorsiklo gikan sa City of Naga Proper ug paingon sa Pangdan.
Pag-abot sa naasoy nga lugar, ang sakyanan nga gisundan sa motorsiklo nihunong hinungdan nga ni-overtake motorsiklo ug nilapas sa lane sa van hinungdan nga nagbangga.
Tungod sa hitabo ang driver sa motorsiklo ug mga pasahero niini naangol ug daling gidala sa Naga Infirmary alang sa medical treatment. — /IBM (BANAT NEWS)
- Latest
