JO sa San Francisco, sikop sa drug bust
CEBU, Philippines — Usa ka job order employee sa Lungsod sa San Francisco ug kaipon niini ang nasikop sa buy-bust operation sa PDEA Cebu Provincial Office uban ang San Francisco Municipal Police Station sa Sitio Matnog, Barangay Santa Cruz, Lungsod sa San Francisco niadtong Domingo sa gabii, Oktubre 12, 2025.
Si PDEA-7 Regional Director Joel Plaza miila sa nadakpan nga subject sa operasyon nga si alyas Yoyon, 43 anyos, Job Order employee San Francisco Municipal Government ug nagpuyo sa naasoy nga dapit.
Apil sa nadakpan ang kaipon niini nga si alyas Jannet, 45 anyos, mag-uuma.
Nasakmit atol sa operasyon ang walo ka putos sa gituohang shabu nga nitimbang og 0.24 gram ug mobalor og P1, 632, buy-bust money ug usa ka cellphone.
Nasayran nga si alyas Yoyon nadakpan niadtong 2012 tungod sa illegal nga drugas ug naka plea bargain pag 2018. Kasong kalapasan sa Republic Act 9165 ang ipasaka batok sa mga suspetsado.
Sa pikas bahin, gipahibalo sa Police Regional Office(PRO)-7 nga walay hunong ang operasyon sa tanang matang sa kriminalidad sa rehiyon, gani nakasikio sila og 399 ka indibidwal nga nakahimo og lain-laing krimen.
Nakasakmit sab sila og kinabuk-ang P11 milyones nga balor sa illegal nga drugas, armas, explosives ug bala sa usa ka semana nga anti-criminality operations gikan sa Oktobre 5 hangtod sa 11, 2025.
Drug-free workplace
Sa laing kalamboan usa na karon ka lokal nga balaod sa Probinsya sa Sugbo ang pag-institutionalize sa Drug-Free Workplace sa Probinsya sa Sugbo ug pagpahigayon og random drug testing sa tanang public officers ug personnel niini.
Kini human giaprobahan sa Sangguniang Panlalawigan sa third ug final reading ang ordinansahon nga giduso ni bokal Francis Ouano alang sa maong katuyoan.
Parte kini sa kamandoan si Gobernador Pamela Baricuatro pagbalik og buhi sa opisina sa Cebu Provincial Anti-Drug Abuse Office (CPADAO) aron maoy motan-aw sa mga programa ug inisyatiba sa probinsya sa kampanya batok sa ilegal nga drugas. (BANAT NEWS)
- Latest
