Mobile kitchen gimontar sa lugar nga apektado sa linog

MANILA, Philippines —   Sulod sa upat ka adlaw nga gihingusgan ang disaster relief efforts, ang Department of Social Welfare and Development Field Office 7 (DSWD FO7) nipakatap og mga mobile kitchen ug tangke sa tubig aron mahatagan og pagkaon ug limpyo nga tubig ang mga residente nga naapektuhan sa magnitude 6.9 nga linog.

Niadtong Biyernes, Oktobre 3, ang Mobile Kitchen ug Water Tank sa DSWD FO7 nagsugod sa pag-operate sa Bogo City, nga naghatud sa mga init nga pagkaon ug luwas nga tubig direkta diha sa kadalanan.

Ang mga volunteers gikan sa mga opisina sa gobyerno ug mga pribadong organisasyon nihatag usab sa ilang suporta pinaagi sa pagtabang sa pagkarga sa mga family food packs (FFPs) ngadto sa mga trak nga gisuplay sa Kagamhanan sa Probinsiya sa Sugbo, nga mas nagpadali sa paghatod sa gikinahanglan kaayong food aid ngadto sa mga barangay nga naigo sa linog.

Gitaho usab sa ahensya nga niadtong Oktobre 2, naka-apod-apod kini og 5,000 ka FFPs sa mga LGUs sa Northern Cebu ug nagtumong sa pag-apod-apod og 8,000 pa ka food packs ngadto sa mga komunidad nga Mag-atubang gihapon sa kanihit sa pagkaon sa umaabot nga mga adlaw.

Sa Barangay Lapaz, Bogo City lang, niabot na sa 1,278 ka family food packs ang naapod-apod na sa mga residente samtang, 157 ang inisyal nga nadeliver sa mga pamilya sa Sogod.

Sa kinatibuk-an, ang mga mobile facilities nakaserbisyo na sa upat ka mga barangay ug nakatanyag og pagkaon ug tubig sa dul-an 600 ka mga residente.

Ang DSWD FO7 nipasalig nga magpabilin kini sa hugot nga koordinasyon sa mga apektadong LGUs aron masiguro ang padayon nga paghatod sa mga food packs ug uban pang hinabang, samtang ang katawhan sa Amihanang Sugbo mobangon gikan sa kadaot nga dala sa kusog nga linog.