Duha ka bata gigapos sa poste

CEBU, Philippines — Duha ka mga batang managsuon nga nag-edad og 4-anyos ug 6-anyos nga babaye ug lalaki ang gipanggaid sa ilang amahan diha sa poste ug gipasagdang mauwanan hangtud nga sila naluwas sa mga ilahang mga paryente nga nakakita kanila alas-11 pasado sa gabii.

Gikustodiya na karon sa buhatan sa City Social Welfare and Development (CSWD) ang mga bata.

Ang duha gihigot sa electrical post duol sa ilang panimalay sa Barangay Maribago sa Siyudad sa Lapu-Lapu atol usab nga nagbunok ang kusog nga ulan.

Samtang ang ilang amahan gidakop sa kapolisan ug gibalhog sa prisohan sa Presinto 2  sa Lapu-Lapu City Police Office (LCPO) alang sa posibleng pagpasaka kaniya og kaso.

Sa nasayran nga ang maong duha ka mga bata nga nagpanuigon og 4 ug 6 anyos gikuha sa mga Barangay Tanod pinangulohan ni Barangay Kapitan Russel Abing human sa insidente.

Dali nga gisusi nila ni Abing ang maong dapit human dunay nitawag kanila bahin sa gibuhat sa usa ka amahan ngadto sa mga anak niini.

Si Abing miingon nga ang amahan sa mga bata ang nalakip sa ilang gimonitor tungod sa nalambigit kini sa paggamit  sa ilegal nga drugas.

Sa pasiuna nga pagsukisukit ni Abing ang amahang suspek nihimakak kini sa pasangil kay matud pa niya didto lang siya sa gym sa ilang barangay kay iyang gipangita ang inahan sa duha  mga bata.

Matud niya nalangan lang sa pagbalik kay mitan-aw pa siya nagdula og basketball. IBM BANAT NEWS