Marcos Jr. nagpasalig sa mas lig-on nga serbisyo ug programa sa gobyerno

CEBU, Philippines — Gipadayag ni Presidente Ferdinand R. Marcos Jr. nga ang iyang administrasyon mosuporta sa pagpalambo sa lain-laing sektor sa gobyerno aron mas molig-on pa ang mga programa ug ma-moderno ang serbisyo atol sa iyang 2025 State of the Nation Address (SONA) niadtong Hulyo 28, 2025.

Sa iyang pamulong, giila ni Marcos nga ang tumong sa administrasyon dili lang aron mapaayo ang kahimtang sa mga Pilipino karon, kon dili alang usab sa sunod nga henerasyon.

“We are building not only for today; we are building also for tomorrow,” matod pa ni Marcos.

Gihisgutan usab niya ang mga prayoridad diin lakip niini ang edukasyon, kalamboan sa trabaho, panglawas, seguridad sa pagkaon, modernisasyon sa gobyerno, imprastruktura ug enerhiya.

Trabaho, edukasyon ug panglawas

Bisan pa man sa nakitang pagkunhod sa unemployment rate sa nasud ngadto sa 4%,  ang Department of Labor and Employment (DOLE), Department of Trade and Industry (DTI), Department of Social Welfare and Development (DSWD), Department of Tourism (DOT) ug uban pang ahensya nagpadayon sa paghimo og trabaho ug panginabuhian para sa mga Pilipino.

Matud ni Marcos ang edukasyon gihapon ang usa sa mga prayoridad sa iyahang administrasyon. Pinaagi sa gipalapdan nga scholarship program sa mga state universities and colleges (SUCs) ug Technical Education and Skills Development Authority (TESDA) mas daghang mga  estudyante na ang nakabenepisyo sa libre nga edukasyon.

Ang Department of Education (DepEd) nibukas og 16,000 ka teaching positions ug gipasayon karon ang hiring system. Dugang niiini, ang dugay na nga gipangayo nga overtime ug overload pay alang sa mga magtutudlo gipondohan na sa administrasyon.

Sa sektor sa panglawas, dili na mopagawas og kwarta gikan sa ilang kaugalingong bulsa ang mga pasyente nga ma-ospital sa mga ospital nga gipadagan sa Department of Health (DOH) tungod sa zero-balance billing policy.

Kini nga palisiya naghiusa sa PhilHealth ug uban pang medical assistance fund aron mabayran ang tanang gasto sa tambal ug serbisyo. Lakip sa mga programa sa gobyerno nga may kalabotan sa panglawas mao ang Yaman ng Kalusugan Program (YAKAP) ug ang gipalapdan nga Bagong Urgent Care and Ambulatory Service (BUCAS).

Naghatag ang YAKAP og libre nga outpatient services sama sa laboratory tests, follow-up checkups, ug libre nga tambal para sa mga PhilHealth members. Samtang ang BUCAS nag-deploy og mobile clinics ug tuyong magtukod og mga specialty clinics sa tibuok nasod.

Sistema sa transportasyon

Usa usab sa mga gitutokan sa administrasyon ni Marcos mao ang pagpalambo sa imprastraktura sa nasod aron mapahapsay ang dagan sa trapiko ug mapa-usbaw ang serbisyo ngadto sa mga komyuter.

Lakip sa dagkong proyekto mao ang North-South Commuter Railway, Metro Manila Interlink Bridge, South Luzon Expressway (SLEX) extension ngadto sa Tiaong, Quezon, rehabilitasyon ug extension sa Philippine National Railways (PNR) ngadto sa Quezon ug Bicol region, ug ang Mindanao Transport Connectivity Improvement Project.

Gisuportahan usab sa administrasyon ang pagbalik sa “Love Bus” ug gisaka ngadto sa 50% ang diskwento sa pletehan sa LRT ug MRT alang sa mga estudyante ug senior citizen.

Serbisyo sa gobyerno, online na

Aron mas mapadali ang serbisyo, gilusad ang eGov PH Super App, usa ka digital hub nga adunay kapin 100 ka serbisyo sa gobyerno, gikan sa pagkuha og permit ug lisensya ngadto sa pag-renew sa ID ug pagpa-rehistro.

Kini nga app nagpasayon sa transaksyon sa gobyerno, nagpakunhod sa gastohan ug nakatabang pagpaminos sa korapsyon.

Sa laing bahin, gipadayag ni Marcos nga ang National Broadband Plan Phase 2 naghatag og high-speed internet sa mga pampublikong tunghaan ug opisina sa gobyerno.

Padayon usab ang digitalization efforts pinaagi sa Open Government Partnership ug Public Financial Management reforms aron masiguro ang transparency ug accountability.

Seguridad sa pagkaon

Kapin 200,000 ka benepisyaryo sa agrarian reform ang nakadawat og land titles. Dugang pa, wala na gipabayran ang P57.56 bilyon nga utang sa amortization nga nakapahupay sa pinansyal nga problema sa liboan ka mga mag-uuma.

Aron mas mapalig-on ang sektor sa agrikultura, gipadali ang mechanization ug proyekto sa irigasyon samtang gihingusgan nga ibalik ang industriya sa lubi, asin, ug asukal.

Kahinumduman usab nga gilusad ang P20 kada kilo nga bugas nga nagtumong nga makabaligya og baratong bugas samtang nagtabang sa mga mag-uuma. Ang Department of Agriculture nigahin og P113 bilyones nga pondo aron mapalig-on ang ilang mga programa alang sa pagkab-ot sa food security.

Ang trabaho magpadayon

Gipasabot ni Marcos nga bisan pa nga daghan na ang nahimo sulod sa tulo ka tuig, daghan pa ang angay buhaton aron mapadayon ang kalamboan.

“The work is not yet finished…[and] we need to exert twice the effort to sustain our progress,” matod pa ni Marcos.

Gidugang niya nga ang pamuhunan karon dili lang alang sa kasamtangang panahon apan alang usab sa kaugmaon sa sunod nga henerasyon.

Editor's Note: This press release for the Presidential Communications Office is not covered by Philstar.com's editorial guidelines.