Re-routing ipatuman sa siyudad sa Talisay
CEBU, Philippines — Ipatuman sunod semana ang re-routing sa mga Modernized PUJ alang sa pagtrabaho sa karsada sa Barangay Dumlog lahos sa Barangay San Isidro.
Kini maoy gipahibawo ni Jonathan Tumulak, pangu sa City of Talisay-Traffic Operation Development Authority (CT-TODA).
Ang pagtrabaho sa road concreting sugdan karong Septiyembre 16 ug matapos sa Oktubre 26 ning tuiga.
Si Tumulak ang nakigtigom sa mga MPUJ operators ug sila nagkauyon sa temporaryo nga rota nga ipatuman samtang padayon ang pagtrabaho.
Ang MPUJ gikan sa Poblacion mosubay sa dan Rizal molahos sa dan F. Bas, mo right turn sa Bacaltos St. o naila nga sombrea padung na sa N. Bacalso Avenue ug balik na sa ilang destinasyon.
Aduna sab rota nga gikan sa Poblacion mosubay sa dan Rizal lahos sa dan F. Bas, mo right turn sa Talisay City Hall ug mogawas sa Cebu South Coastal Road ug left turn sa San Isidro road unya balik sa destinasyon.
Ang ikatulo nga rota mao ang gikan sa Poblacion mosubay sa dan Rizal mo right turn sa P. Del Rosario mo right turn sa dan P. Del Rosario mo left turn sa Uldog ug mo left turn sa Cebu South Coastal Road dayon right turn sa dan San Isidro ug balik na sa destinasyon.
Si Tumulak ang una nasab nga nakigpulong sa mga residenti sa dapit aron ipahibawo nga ipatuman ang trabaho lakip na ang nanag-iya og establisamento aron paspas ang pagtrabaho.(BANAT NEWS)
- Latest
