Seawall sa Tanke sugdan na ang pagtrabaho

CEBU, Philippines — Gikatakdang sugdan na sa pagtrabaho ang seawall sa Barangay Tanke, Dakbayan sa Talisay nga nangaguba.

Sa gihimo nga inspeksiyon sa opisyales sa barangay ug sa city engineering office nasuta nga 80 porsyento sa seawall ang naguba gumikan sa kusog nga bawod tungod sa habagat ug bagyo.

Ang mga residente sa lugar kinsa nabalaka nga maguba ang ilang kabalayan tungod kay wala nay makasagang sa dagkong bawod nanawagan nga maaksiyonan ang maong problema.

Ang seawall maoy nagsilbing proteksiyon sa kabalayan tungod kay diha moigo ang bawod.

Si Mayor Gerald Anthony “Samsam” Gullas, Jr. nipahibawo nga nahuman na og bidding sa proyekto.

Ug ang phase 1 maglangkub kini sa lima ka sitio samtang sa phase 2 na ang nahabilin. Si Kapitan Jarred Cabilte nagkanayon nga maabot na karong adlawa ang mga heavy equipment nga maoy gamiton sa pagtrabaho.

Nikabat ngadto sa P60 milyones ang pundo nga gigahin alang sa maong proyekto nga gikuha sa disaster fund.

Gihangop kini sa mga residente sa lugar nga sugdan na ang pagtrabaho apan ngadto sa tulo ka sitio nga dili pa malakip sa pagtrabaho nagtampo-tampo lang una sila ug nidawat og donasyon aron temporaryo nila nga mapanalipdan ang ilang pinuy-anan.

Nagkanayon si Gullas nga ilaha pa nga gipangitaan og pundo alang sa uban nga seawall diha usab sa ubang mga barangay nga trabahuon. BDB BANAT NEWS