Tabo sa Kapitolyo padayon hangtud sa Domingo

CEBU, Philippines — Kung walay mag-uuma, walay pagkaon nga mahukad sa talad kan-anan busa giila ang ilang kakugi sa gipahigayon nga food summit subay sa ika 456th Founding Anniversary sa Sugbo.

Nakadisplay karon sa compound sa Kapitolyo ang nagkadaiyang produkto sa mga mag-uuma. Adunay mga root crops, lagutmon, prutas, utanon ug uban pa.

Anaay mga buwad, ginamos, og mga presko nga pagkaon gikan sa kadagatan nga gikan sa mga kaislahan ang gitumod sa tabo.

Kining tanan bunga sa kahago sa mga mag-uuma ug mangisda nga nikayod aron adunay makaon ang katawhan.

Atol sa kasaulogan sa founding anniversary sa lalawigan sa Sugbo gibida ang mga natampo sa mga mag-uuma isip dugokan o backbone sa food security sa nasud.

Gipahigayon ang Agrikonek Food Summit nga gipasiugdahan sa pribadong sector uban sa pakig-alayon sa Department of Agriculture ug Provincial Government.

Gipahimug-atan ni Usec Cheryl Marie Natividad-Caballero, dili lang ang food security kon dili apil na ang food safety aron molambo ug molungtad ang food production nga dako kaayo og papel sa ekonomiya sa nasud.

Ang tabo sa Kapitolyo gilugwayan hangtud adlaw nga Domingo aron mahatagan og kahigayonan ang mga tawo nga makatilaw sa hinaguan sa mga mag-uuma. (BANAT NEWS)