Mga mogradwar sa 4Ps padayung suportahan

CEBU, Philippines —  Agi og suporta sa mogradwar nga mga benepisyaryo sa Pantawid Pamilyang Pilipino Program (4Ps), ang partner nga Civil Society Organizations (CSOs) sa Central Visayas misaad og kapin sa P19 milyones nga mga programa ug serbisyo aron makatabang sa pagpadayon sa ilang kaayohan.

Gipormal sa mga CSO ang ilang pasalig atol sa bag-ohay lang nga tinuig nga CSO Consultation Dialogue alang sa mga probinsya sa Sugbo ug Bohol, diin niabot sa kinatibuk-ang P19,076,438 kantidad sa mga programa ug serbisyo ang naangkon niini.

Ang inisyatiba nahiuyon sa panawagan sa Department of Social Welfare and Development (DSWD) alang sa dugang nga kolaborasyon ug paghatag sa mga komplementaryong serbisyo gikan sa nagkalain-laing stakeholders, lakip ang CSOs, national government agencies (NGAs), ug local government units (LGUs).

Sa Sugbo, ang partner CSOs misaad og Php 5,406,438 nga kantidad sa mga programa nga nagtutok sa panginabuhian, pagbansay sa kahanas, edukasyon, panglawas, nutrisyon, sa mga bata, adbokasiya sa kahimsog sa pangisip, ug uban pang may kalabutan nga kampanya sa impormasyon, nga gihiusa sa binuwan nga Family Development Sessions (FDS).

Ang mga CSOs sa Cebu nga misaad og suporta naglakip sa: Bidlisiw Foundation, Inc., Passerelles Numeriques Philippines, Inc., Global Initiative for Exchange and Development, World Hope International, Ramon Aboitiz Foundation Inc. (RAFI), Restore Children and Family Services, World Vision Foundation, Inc., Philippine Augustinians Development Office, KNAUF Gypsum Philippines, Inc., Mynimo, Cebu Chamber of Commerce and Industry (CCCI), Cebu People’s Multipurpose Cooperative, Lamac Multipurpose Cooperative, Mandaue City Public Market Multipurpose Cooperative, Palawan Pawnshop Group of Companies, University of Cebu – CARES, Cebu Roosevelt Memorial College, NACPHIL, IHELP, ug ang Values Formation and Spiritual Transformation Council Philippines.

Samtang, sa Bohol, 17 ka CSO partners mipasalig sa kinatibuk-ang Php 13,670,000.00 sa mga serbisyo nga gitumong ngadto sa livelihood ug technical-vocational nga pagbansay-bansay, nga mao ang agricultural production, aquaculture, food processing, tailoring, ug eco-bag production.

Kini nga mga CSOs naglakip sa Speech Language and Beyond Therapy, Inc., Sunbeam Global Values Formation and Leadership Training Inc., PROCESS Bohol, Inc., Badjao Bridge Inc., International Care Ministries, Inc., BIDEF, VOH Orphanage, NACPHIL, Shepherd’s Arms Foundation, Inc., Bohol Sunshine Home Foundation, Trinity’s Angel Care Home Orphanage, World Vision Foundation, Inc., IMAP, Bohol Island State University, Community Economic Venture Inc., Arms of Love, ug Fullness Home Orphanage Inc.

Gawas sa skills development, pipila ka mga CSOs sa Bohol ang mohatag og suporta pinaagi sa educational scholarships, therapy services, mobile community learning hubs, ug educational campaigns, therapy services, mobile ug community learning hubs, ug health ug nutrition programs, lakip ang free medical consultations, diagnostic tests, ug ang konstruksiyon sa sanitary facilities. (BANAT NEWS)