Gipasanginlang nanglugos sa menor gikasohan na

CEBU, Philippines — Hingpit na nga gipasakaan og kaso nga two counts of rape ang usa ka  42-anyos ang construction worker kinsa gipasanginlan sa 14-anyos nga dalagita nga anak sa kapuyo niini nga niamong-among kaniya.

Ang maong insidente nahitabo diha sa usa sa mga barangay sa Dakbayan s Lapu-Lapu.

Si Police Lieutenant Colonel Christian Torres, tigpamaba sa Lapu-Lapu City Police Office (LCPO) nagkanayon nga mahimo pa gihapon nga ipasaka ang dugang nga mga kaso base sa mga alegasyon sa biktima nga makadaghang higayon ang gihimong paglugos kaniya.

Matud ni Torres nga dugang alegasyon sa biktima nga naidtong Lunes Hulyo 21, 2025  ang suspetsado niamong-among kaniya duha ka higayon  diin ang unang insidente  alas  4:00  sa hapon ug gisundan sa ikaduha mga alas  6:20 sa gabii sa maong adlaw.

Ang kapolisan nihimo dayon kini og hot pursuit operation ug nakasikop ang suspetsado diha sulod sa ilang panimalay.

Gibutyag ni Torres nga sa ilang imbestigasyon giangkon sa suspetsado nga adunay nahitabo nila ug sa biktima apan gihimakak niini nga pagpanglugos ang iyang gihimo tungod kay nagkasinabtanay sila ug sa biktima.

Gikatahong gibutyag sa suspetsado nga upat na kini ka higayon niyang gihimo ngadto sa biktima sukad pa niadtong tuig 2023.

Samtang ang 50-anyos nga inahan sa biktima nga nagtrabaho usab sa construction ug kapuyo sa suspetsado ang nipadayag nga dili kini makatuo nga makahimo niini ang suspetsado ngadto sa iyang anak nga dalagita.

Matud sa inahan sa biktima nga gikapuyo na niya ang suspetsado dihang lima pa ka bulan ang mao niyang anak.

Ang biktima maoy kamanghuran sa walo niya ka anak ang nagtahod sa suspetsado nga sama sa ilang amahan ug maayo usab kini kaayo nga motagad ngadto sa iyang mga anak.

Dugang ni Torres nga kon ang biktima mahinumdom sa tukma nga oras ug petsa sa uban pa nga gihimong pag-among-among ngadto kaniya, ang suspetsado mahimo pa gihapon nga kapasakaan og dugang pa nga mga kaso. (BANAT NEWS)