10 drug suspects nadakpan

CEBU, Philippines — Nasakmit  ang 200 gramo nga shabu sa kapolisan sa Consolacion Police Station gikan sa tulo ka tawo sa buy bust operation nga gipahigayon sa Barangay Garing, Lungsod sa Consolacion alas-10  pasado  ang takna sa miaging Huwebes sa gabii Hunyo 5,  2025.

Ang mga nadakpan mao sila si Pablito, 36,nga giilang  HVI nga pusher ug iyang mga kaubang sila si Christopher ,45, ug Geronimo, 29.

Ang mga sakop  sa Municipal Intelligence Unit (MIU) sa Consolacion Police  Station nakapalit sa mga suspek og 200  gramong shabu nagkantidad og P1, 360.000.00  nga giputos og 17 ka bulto ug gisulod sa blue nga sling bag hinungdan nga sila gidakop.

Sa laing operasyon, dul-an P900,000 nga balor sa illegal nga drugas ang nasakmit sa mga operatiba sa PNP Drug Enforcement Unit-Special Operations Group, Waterfront Police Station 3, Pari-an Police Station 1 ug Carbon Police Station Cebu City Police Office sa managlahing barangay sa Cebu City.

Ang PNP DEG -SOU-7 nagpahigayon og buy-bust operation sa Sitio Tugas San Roque, Barangay Mambaling, Cebu City niadtong Huwebes sa hapon, Hunyo 5, 2025 ug nadakpan si Allan Ebis Tabalin alyas Scorpion, 58, nga usa ka high value individual ug nakuhaan kini og 70 gramos nga gidudahang shabu nga nagkantidad og P476,000.

Samtang nadakpan sab sa Waterfront Police Station 3 si Jefferson Ampuon Cabangca alyas Otin, 2, taga Belgium Street, Barangay Suba ning siyudad.

Follow-up operation kini sa gihimo nilang buybust operation diha sa Doña Pepang, Barangay Tejero, Cebu City. Nasakmit gikan sa suspek ang 50.20 grams nga shabu nga nibalor og P341,000.

Duha sab ka mamarokay sab ang nadakpan sa mga operatiba sa Pari-an Police Station 1 diha sa M. Lazarte Street, Barangay Pari-an ning siyudad.

Ang mga nadakpan mao sila si Richard Herebese Barangan, 50 , ug kauban nga si Marilyn Kabinte Genovesa, 36, parehong taga Sitio Lutaw-Lutaw, Barangay Sto. Niño, Cebu City ug nakuhaan sila og 5 grams nga shabu nga nagkantidad og P34,000.

Ang Carbon Police Station nihimo sab og buy-bust operation sa Sitio Bato, Barangay Ermita ug nasikop silang Zoren Flores alyas Zoren, 25, ug Janice Cañete, 30, pulos taga Barangay Ermita ug nakuhaan sab og 5 grams nga shabu nga nibalor og P34,000.

 Samtang usa sab ka high value individual(HVI) ang nadakpan sa mga operatiba sa PDEA-7 Regional Special Enforcement Team(RSET) uban ang PNP DEG-SOU-7 sa ilang buy-bust operation sa Sitio Bugnay II, Barangay Labangon, Siyudad sa Sugbo niadtong Huwebes sa gabii, Hunyo 5, 2025.

Ang nadakpan mao si alyas Drake, 37, nga nakuhaag upat ka putos nga gituohang shabu nga 60 gramos ug nagkantidad og P408,000 ug buy-bust money.

Nasayran sab nga ang suspek nadakpan na niadtong 2017 sa kasong kalambigitan gihapon sa illegal nga drugas ug nakapiyansa.

Tanang operasyon gihimo basi sa impormasyon gikan sa komunidad.

Kasong kalapasan sa Sections 5 ug 11, Article II sa Republic Act 9165 ang ipasaka batok sa tanang mga dinakpan. IBM BANAT NEWS