Speed limit ordinance gipasar sa junta probinsyal

CEBU, Philippines — Mipasar og balaod ang hunta probinsyal sa Sugbo nga naglatid og regulasyon sa speed limit sa tanang matang sa sakyanan nga moagi sa kadalanan sa lungsod sa Bantayan, Santa Fe ug Madridejos sa isla sa Bantayan ug sa lungsod sa Tudela, Poro, Pilar ug San Francisco sa isla sa Camotes.  Base sa Speed Limit Ordinance of the Tourist Island of Bantayan and Camotes, ang general speed limit sa tanang provincial roads anaa ra sa 30 kilometer per hour (kph) alang sa tanang motor vehicles.

Sa maong ordinansa, ang mga sakyanan ug motor kinahanglan nga anaa ra 60 kph ang dagan sa mga national roads; 50kph sa mga provincial roads ug 20kph sa gagmay nga dalan sama sa municipal o barangay roads.  Samtang ang mga bus, trucks ug tricycles, ang dagan kinahanglan anaa ra sa 50kph sa mga national roads; 40kph sa mga provincial roads apil na sa mga intersection ug 20 kph sa mga gagmay nga dalan.

Hinoon adunay exceptions sa gilatid nga speed limits — sama sa mga driver sa sakyanan nga adunay nagsakay nga mga doktor o health workers nga padulong mo responde sa mga emerhensiya; ambulance ug kadtong mga sakyanan nga nagdala og indibidwal nga adunay samad o injury padulong sa hopsital o clinic.

Apil usab sa exempted kadtong mga drayber sa motor nga sakop sa Armed Forces nga nakaduty ug padulong moresponde kon ugaling adunay riot o kagubot.

Ang mga Local Traffic Management Office ang gitahasan nga mo install og mga traffic signs nga naglatid sa speed limit sa tanang mga dalan, aron magiyahan ang mga drayber.

Ang mga makalapas sa maong balaod, mamahimong ipaubos og seminar ug pamultahon og P1, 000 ngadto sa P3, 000 gikan sa first offense hangtud sa third offense. (BANAT NEWS)