Mga proyekto sa karsada sa siyudad sa Carcar gisugdan na

CEBU, Philippines — Opisyal nang gisugdan sa Cebu Provincial Government ang konstruksyon sa tulo ka lahi-lahi nga proyekto sa kalsada sa Carcar City, nga nagtimaan sa usa ka dakong lakang padulong sa pagpaayo sa imprastruktura sa maong lugar.

Si Gobernador Gwendolyn Garcia, Carcar City Mayor Patrick Barcenas, ug First District Representative Rhea Mae Gullas ang nangulo sa groundbreaking ceremony alang sa tulo ka dakong proyekto sa pagpauswag sa kalsada sa Barangay Calidngan niadtong Martes, Abril 15, 2025.

Ang Capitol nagtakda og budget nga P76.4 milyon alang sa mga proyekto, nga tumong niini mao ang pagpadasig sa mobilidad ug pagpanghatag og kalamboan sa ekonomiya sa upland nga barangay sa maong dakbayan sa habagatang Cebu.

Ang unang proyekto sa kalsada naglakip sa pag-konkreto sa 0.431-kilometer nga bahin sa Sitio Proper Barangay Road, nga may pondo nga P4.45 milyon.

Ang ikaduhang proyekto, nga usa ka mas dako nga inisyatibo, naglangkob sa konstruksyon sa 5.164 kilometro nga magdugtong sa Sitio Lunas, Sitio Latab, ug Sitio Pit-Os, nga may budget nga P55.6 milyon.

Sumala sa Sugbo News, ang opisyal nga media arm sa Kapitolyo nga ang duha ka road segments sakop sa barangay roads.

Segun sa mga specifications sa Kapitolyo, ang kalsada naay 6.10 ka metro ang gilapdon ug may gibag-on nga 9 pulgada sa semento. Ang proyekto dunay budget nga P16.3 milyon.

Inig human niini, ang mga road sections gilauman nga magpauswag sa mobilidad ug accessibility sa mga komunidad, ug magpataas usab sa value sa mga palibot nga properties.

Gawas sa pag semento, ang matag usa sa tulo ka road sections butangan ug solar-powered lampposts nga nakabutang sa reinforced concrete pedestals, aron maghatag og mas maayo nga visibility ug kaluwasan sa mga motorista ug pedestrian, labi na sa gabii. — /MEL (BANAT NEWS)