Patay nga puya gisulod og bawnanan

CEBU, Philippines — Nihimo na og imbestigasyon ang Mambaling Police Station 11 Cebu City Police Office bahin sa nakit-ang puya nga wala'y kinabuhi sa basurahan diha sa Gabuya Street, Barangay Mambaling, siyudad sa Sugbo niadtong Domingo sa gabii, Abril 13, 2025.

Ang Mambaling Police Station 11 nakadawat og tawag gikan sa concerned citizen labot sa nadiskobreng puya sa naasoy nga dapit.

Daling niresponde ang kapulisan sa Mambaling Police Station ug pag-abot sa lugar nakit-an ang wala nay kinabuhi nga puya nga gibutang og gamay nga transparent box.

Ang puya gibana-bana nga naa sa lima ngadto sa unom ka buwan kini subay na sa assessment sa personnel sa CDRRMO ug SOCO-7.

Sa inisyal nga imbestigasyon sa Mambaling Police Station 11 pasado alas 8 sa gabii sa samang adlaw usa ka Melvin Ucan, garbage collector maoy nakabantay sa gamay nga transparent box  kauban sa basura. Apan sa iyahang pag-abli nakuratan kini kay puya ang sulod niini maong dali kining ni report sa kapulisan. Nagpadayon ang imbestigasyon sa kapulisan aron mahibaw-an kinsay naglabay sa puya. (BANAT NEWS)