Lambay nasobrahan na og kuha—BFAR

CEBU, Philippines —  Nanawagan ang Bureau of Fisheries and Aquatic Resources (BFAR) sa mga mananagat ug local government units (LGUs) sa hugtan ang pagpatuman sa mga bag-ong regulasyon sa pagpanagat ug pagbaligya aning  Blue Swimming Crabs (BSC) o gitawag nga “lambay” aron malikayan ang overfishing ug mapanalipdan ang industriya niini.

Sumala sa taho sa Philippine Information Agency (PIA) Region 7, ang BFAR sa nakigtambayayong sa Department of Agriculture (DA) ug Department of the Interior and Local Government (DILG) nipagawas og Joint Administrative Order No. 01 bahin niini.

Usa kini ka giya sa mga LGUs aron dili masobrahan og kuha ang mga lambay diha sa ilang mga kadagatan.

Giagni sab ang LGUs nga pasilotan kadtong mga molapas sa kamandoan ubos sa ilang hurisdiksyon.

Matud sa BFAR mao lang kini ang paagi aron maprotektahan ang populasyon sa mga lambay aron dili kini hingpit nga mahurot sa kadagatan sa tanang coastal towns sa rehiyon.

Si Alberto G. Simbajon Jr., officer-in-charge sa Enforcement and Regional Monitoring, Control and Surveillance Operation Center sa BFAR Central Visayas, kinahanglang susihon gyud sa LGUs kun rehistrado ang mga mananagat nga tiggamitan og “bobo” o “panggal” nga pang-lambay aron ma-regulate ug ma-record ang ilang mga kuha.

Ubos sa maong kamandoan, gidili na ang pagkuha ug pagbaligya sa mga lambay nga moubos sa 10.2 ka sentimetro o 4.02 pulgadas(inches) ang gilapdon sa carapace o tipaka sa likod niini.

Gidili sab ang pagkuha, pagdala ug pagbaligya og mga “berried” crab — o kadtong dunay mga bihod nga mga lambay o alimango.

Kinahanglan na sab nga duna silay balidong auxiliary invoice ug Local Transport Permit (LTP) nga giisyu gikan sa LGU.

Ang makalapas sa maong mga lagda mag-atubang sa silot nga multang P2,000 ngadto sa P20,000 o pagkapriso sulod sa unom ka bulan ngadto sa duha ka tuig, base sa probisyon sa Republic Act 8550 o Fisheries Code of 1998 ug Republic Act 9147 o ang Wildlife Conservation and Protection Act.

Atol sa gipahigayong Coastal Law Enforcement Alliance (CLEAR) meeting sa Dakbayan sa Sugbo, si Simbajon miingon nga kinahanglang seryusong tumanon sa mga LGUs ug stakeholders ang mga balaod ug giya sa panagatan aron masigurong dili mahurot ang supply sa mga pagkaong gikan sa kadagatan.

Sa pagkakaron, ang crab fishing naa sa red status nga nagpasabot nga nasobrahan na ang pagpanguha niini.

Kun mabantayan diha sa mga kamerkadohan, daghang mga gibaligyang mga lambay nga pwerteng gagmaya pa ug wala pa makapangitlog. (CEBU NEWS)