Namatay samtang nag-vlog?

CEBU, Philippines — Duha ka anggulo ang gitutokan sa kapolisan sa Dakbayan sa Talisay labot sa kamatayon sa usa ka traysikol drayber nga usa sab ka vlogger.

Ang namatay nga si alyas Feliciano, 55 anyos napalgan nga patay didto sa Sitio Quadra, Barangay Lagtang, Syudad sa Talisay niadtong Huwebes sa buntag.

Ang patay nga lawas naa na kini sa state of decomposition o nanimaho na gyud kini.

Si Police Lt. Col. Maila Maramag, hepe sa kapolisan sa Talisay nga ang namatay na agni sa iyang amigo nga maghimo og video content nga “stunts” o dili sayon nga aksyon.

Ang stunts himuon kini sa mga praktisado nga indibidwal nga mahimong delikado kung dili ka eksperto.

Gikaingon nga nagkasabot ang namatay ngadto sa iyang amigo nga maghimo sa stunts pero sa dili pa sila mag video ila una kining praktison ang ilang buhaton.

Apan wala makatunga ang amigo sa namatay hinungdan nga nilahos siya ngadto sa kalibunan ug posible nga siya ra ang nagbansay sa iyang stunt.

Sa kilid sa patay nga lawas sa biktima nakit-an ang alambre nga naa sab ang iyang cellphone nga posible nga nisuway kini sa paghimo og content apan nadisgrasya kini.

Niadto pang Abril 6 kini katapusan nakit-an hangtud nga gipangita ug karon pa napalgan nga patay na.

Si Maramag niingon nga ang disgrasya o aduna bay foul play ang anggulo ang ilang gitan-aw niini nga panghitabo.

Ipaubos nila sa autopsy ang patay nga lawas sa biktima aron masuta ang hinungdan sa kamatayon niini.  IBM BANAT NEWS