Kings nanuktok sa NBA postseason
CEBU, Philippines — Si Zach LaVine mipabuhagay og 43 puntos sa dihang ang Sacramento Kings mipaduol ngadto sa NBA postseason uban ang 127-117 nga kadaogan batok sa Detroit Pistons.
Ang Kings, nga padayong nanikaysikay aron makasud sa Western Conference play-in tournament, nakarekober human malubong og 18 puntos aron pagkulit og krusyal nga daog kagahapon didto sa Little Caesars Arena sa Detroit, Michigan.
Sila si LaVine, DeMar DeRozan ug Domantas Sabonis ang nangu sa Kings pagtumba sa Pistons, nga naka-angkon na og luna sa Eastern Conference playoffs.
Si LaVine miposa og walo ka 3-pointers sa gipaulbo niyang 43 puntos, si DeRozan miharos og 37 puntos, samtang si Sabonis mipupo og triple-double nga 19 puntos, 15 ka rebounds, ug 10 ka assists.
Tungod sa sagunson nilang daog, ang Kings nagpabilin sa ikasiyam nga dapit sa West bitbit ang 39-40 rekord. Usa ka daog lamang ang ilang bentaha sa Dallas Mavericks, nga anaa sa ika-10 nga puwesto uban ang 38-41 nga baraha.
Kay upat ka duwa na lang ang nahibilin sa dili pa matapos ang regular season karong Lunes, ang Kings ug ang Mavericks hayag nang makasud sa play-in.
Ang bugtong team nga makapalagpot kanila mao ang Phoenix Suns, nga nagbarog sa ika-11 nga dapit uban ang 35-43 nga marka.
Sa laing duwa, ang Miami Heat nag-warm up alang sa play-in sunod semana pinaagi sa 117-105 ngqa pagpakaging sa natagak nang Philadelphia 76ers.
- Latest
