Lalake sikop sa buy-bust ug nakuhaan og armas
CEBU, Philippines — Nadakpan sa mga operatiba sa City Drug Enforcement Unit sa Cebu City Police Office ang usa ka 19-anyos nga lalake atol sa ilang buy-bust operation sa sitio San Juan, Barangay Mambaling, siyudad sa Sugbo kagahapon sa kadlawon, Huwebes, Marso 27, 2025.
Ang suspetsado mao si Nathaniel Sermillon Cenabre alyas Insik, nagpuyo sa sitio Riverside, Barangay Duljo Fatima ning siyudad.
Nasakmitan ang suspetsado og 105 grams nga shabu nga nagkantidad og P714,000.
Ang mga ebidensya nga nakuha gisumetir na sa Cebu City Forensic Unit-7 alang sa chemical analysis.
Gawas sa illegal nga drugas nakuhaan sab ang suspetsado og calibre .357 revolver nga dunay upat ka buhing bala.
Base sa gitug-an sa suspect ngadto sa kapolisan bag-ong palit ang armas ug gamiton kini sa ilang grupo kay aduna silay giplanohan nga tumbahon.
Nasayran ang maong suspetsado sakop niadtong gun-for-hire group nga nadakpan sa Mambaling Police Station 11.
Ang trabaho sa suspect siya maoy magsilbing spotter ug lahi ang mamusil, apan siya ang motago sa armas.
Kasong kalapasan sa Republic Act 9165 ug Republic Act 10591 ingon man COMELEC Resolution No. 11076 kun COMELEC Gun Ban ang ipasaka batok sa suspetsado. (BANAT NEWS)
- Latest
