CEBU, Philippines — Ang piskal sa International Criminal Court (ICC) gipaabot nga moduso og dugang ebidensiya batok kang kanhi presidente Rodrigo Duterte gawas sa mga gigamit nga basehan sa pagluwat og warrant sa pagdakop kaniya.
Base sa taho sa Philippine Star, sa iyang tulo ka pahina nga komunikasyon ngadto sa ICC Pre-Trial Chamber I pinetsahan og Marso 24, 2025 si ICC Prosecutor Karim Khan nagkanayon nga ang 181 items nga giduso kaniadto ngadto sa defense team ni Duterte wala maglakip sa mga material mahitungod sa pito ka witnesses.
Ang dugang mga detalye kabahin sa ebidensiya dili available tungod kay kini confidential.
Apan ang court filing nagpakita nga ang mga judge nitugot sa hangyo sa ICC prosecutor nga lugwayan ang deadline sa pagbutyag sa mga ebidensiya kalabot sa arrest warrant materials sa pito ka saksi. Atol sa unang pag-atubang ni Duterte ngadto sa tribunal niadtong Marso 14, 2025 si ICC Pre-Trial Chamber I Presiding Judge Iulia Motoc nimando sa prosecutor sa pagsugod sa pagbutyag sa impormasyon nga gibase sa pag-isyu sa warrant of arrest ug kompletohon kini nga pagbutyag nga dili molapas sa sunod nga pito ka adlaw o hangtud sa Marso 21, 2025.
Si Khan nagkanayon nga ang 181 items gi-tag nga “Pre-Confirmation INCRIM package 001” ug gibutyag ngadto sa defense team ni Duterte niadtong adlawa.
Gitugotan sa Pre-Trial Chamber I ang hangyo alang sa extension kaniadtong Marso 20, 2025 apan dili klaro kong unsa ang bag-ong deadline alang sa nahibilin nga ebidensiya.
Ang kamara nagpagawas og buwag nga mando kaniadtong Marso 21 nga nagmando sa piskal ug sa depensa nga maghatag og mga obserbasyon ug pipila ka pasiuna nga mga pangutana sa wala pa ang pagkompirma sa pagdungog sa mga kaso sa Septiyembre 23, 2025. Gawas sa gigamit nga basehanan sa warrant of arrest gipaabot nga mopresentar pa ang piskaliya sa ICC og dugang ebidensiya batok kang Duterte sa sunod nga pagdungog.
Gikataho nga bisan sa mga pagbatikos ug mga alegasyon batok sa ICC ug sa mga pre-trial judge, ang tigpamaba sa tribunal nga si Fadi El Abdallah nagkanayon nga sila nagpabilin nga naka-focus sa pagpatuman sa ilang mandato.
Matud ni Abdallah nga ang international nga hukmanan pabiling adunay hurisdiksiyon sa mga giingong krimen nga nahitabo sa panahon nga ang usa ka nasud partido pa sa Rome Statute ug iyang gipasabut nga ang pag-withdraw dili makaapekto sa mga obligasyon ug hurisdiksyon sa ICC. (BANAT NEWS)