Mga estudyante nagprotesta

CEBU, Philippines — Ang mga progresibong grupo sa kabatan-onan ug organisasyon sa mga estudyante gikan sa nagkalain-laing unibersidad sa Sugbo nipahigayon og dakong Student Walkout kagahapon, Marso 17, 2025, aron magprotesta batok student repression, red-tagging, ug kurapsyon sa gobyerno.

Ang mobilisasyon, nga giorganisa sa mga progresibong grupo sa kabatan-onan ug sektoral nga organisasyon sama sa Anakbayan ug Kabataan Partylist, nanawagan alang sa akademikong kagawasan, katungod sa pag-organisa, ug hustisya alang sa mga biktima sa gubat batok sa droga.

Ang nagprotestang mga estudyante gikan sa University of the Philippines (UP) Cebu, Cebu Normal University (CNU), University of San Carlos (USC), University of San Jose-Recoletos (USJR), Southwestern University (SWU), ug Cebu Institute of Technology - University (CIT-U) usa usab ka paghandom sa militant spirit sa First Quarter Storm— usa ka makasaysayanong serye sa mga protesta batok sa tyranny ug pagpanglupig sa panahon sa diktadorya ni Marcos Sr.

Matud ni Jose Paolo Echavez, 2nd nominee sa Kabataan Partylist, usa sa mga mahinungdanong isyu nga gisinggit sa mga estudyante mao ang student repression sulod sa mga unibersidad, diin ang mga student councils, mga organisasyon, ug mga publikasyon nag-atubang sa censorship ug budget cuts.

Matod ni Echavez nga nagkadaghan ang mga hulga sa expulsion ug pagpahawa sa mga opisina niadtong mosulay sa pagbutyag sa mga kritikal nga isyu diha sa mga eskuylahan.

“We have the right to express ourselves guaranteed by our constitutional rights. Whether critical or not, dili dapat ipahunong or ipa silence ang mga students sa ilang mga panawagan bisan asa man na aspect sa society," saysay ni Echavez. (BANAT NEWS)