Kawatang nag-brief nadakpan   

CEBU, Philippines — Kawatan nga mag-brief kun manulod og balay sa Dakbayan sa Lapu-Lapu nadakpan na gyud apan didto kini madakpi sa Dakbayan sa Toledo niadtong Sabado sa gabii, Marso 15,205.

Ang suspetsado mao si alyas Ryan, 34, taga Calatrava, Negros Occidental nga giposasan sa mga sakop sa City Intelligence Unit sa Lapu-Lapu City Police Office (LCPO) inabagan sa kapolisan sa Siyudad sa Toledo ug Philippine Coast Guard ug PNP Maritime sa maong siyudad diha sa pantalan.                                                                                                             

Matud pa ni Police Lieutenant Colonel Christian Torres,  tigpamaba sa Lapu-Lapu City  Police Office (LCPO) miingon nga si Alyas Ryan mao ang kawatan nga nisulod sa usa ka balay sa Barangay Maribago niadtong Marso 9,2025.

Atol sa  iyang pagpangawat, naghubo kini tanan sa gisuot ug gibilin lang ang iyang brief ug gipanguha ang mga kabtangan sa panimalay.

Wala siya makabantay nga dunay CCTV camera ang sulod sa balay ug ang iyang gihimo nakuha tanan sa maong gadget ug gi-post kini sa social media.

Nadakpan kini sa kapolisan sa miaging Sabado sa gabii Marso 15, 2025 sa pagkanaug gyud niya sa barko gikan sa Negros Oriental. Gituohan nga human sa pagpangawat, nagpabugnaw ang suspek didto sa ilang lungsod sa Calatrava.

Apan ang pagsikop kaniya dili tungod sa maong pagpangawat kondili sa lain niyang warrant of arrest sa laing kaso nga kalapasan sa Section 11, Article 2 sa Republic Act 9165 o Comprehensive Dangerous Drug Act of 2002.

Si Judge Jose Alfonso Gamos sa Regional Trial Court 7, Branch 51 nga nagbase sa Siyudad sa Lapu-Lapu maoy niluwat sa maong warrant niadto pang Septiyembre 30, 2021 nga adunay piyansa nga P200,000 alang sa iyang temporaryong kagawasan.

Ang maong dinakpan positibong giila nga mao kadtong lalaking nag-brief lang nga nilukdo sa vault nga dunay dakong kantidad nga salapi.

Gawas kaniya, gidakop sab ang iyang ig-agaw nga si alyas Mariel, 30, nga taga Pinamungajan human kini makuhaan og armas nga kalibre .9mm nga pistola nga puno sa bala ang magazine niini apan walay lisensiya.

Sa pikas bahin nadakpan sab ang usa ka 32-anyos nga lalake nga nangawat og battery sa multicab diha sa Purok Mansanitas, Barangay Poblacion, Lungsod sa Liloan niadtong Domingo sa kadlawon, Marso 16, 2025.

Ang suspetsado  taga Sitio Budlaan, Barangay Talamban ning siyudad.

Samtang ang biktima mao si alyas Erwin, 48, taga Purok Mansanitas, Barangay Poblacion, Lungsod sa Liloan.

Base sa imbestigasyon sa Liloan Municipal Police Station ang suspetsado naaktuhan nga nga nangawat og battery sa multicab hinungdan nga gidakop sa biktima. (BANAT NEWS)