Archival nisugyot og mga solusyon pagsulbad sa problema sa baha

CEBU, Philippines — Si Konsehal Nestor Archival sa Dakbayan sa Sugbo nisugyot og mga solusyon sa pagsulbad sa problema sa baha sa siyudad.

Usa sa mga solusyon mao ang pag-desilt diin tangtangon ang mga yuta, basura, ug mga bato sa kasapaan gumikan kay mao kini ang hinungdan nga taas na karon ang lebel sa tubig sa kasapaan sa siyudad.

“Diri sa atong siyudad, mag-abot ang high tide ug ang uwan, ang areas nga duol sa sapa, mosaka gyud ang tubig”, padayag ni Archival.

Nakita usab ni Archival nga giingong wala natarong og dumala ang mga basura sa siyudad diin wala usab kini matarong pag-segregate o adunay higayon nga dili kini makuha dayon sa mga basurero ug makatag kini tungod kay kaykayon sa mga mananap o tawo ug mahimo kining maanod ngadto sa sapa, kanal o tinubdan sa tubig nga hinungdan sa pagkabara ug moawas nga hinungdan usab sa pagbaha sa dapit.

Matud ni Archival nga kinahanglang responsable usab ang katawhan sa ilang mga basura nga ilahi kini daan ug puston og tarong ug ipagawas lang kong anaa na ang basurero aron nga dili kini katag tan-awon diha sa daplin sa dalan.

Laing solusyon nga gituki ni Archival mao nga kinahanglang sundon ang “Rain Catchment Ordinance” diin mapuslan sa katawhan ang tubig uwan sawron kini ug gamiton sa paglimpiyo sa sakyanan o pagpamisbis sa mga tanom.

Si Archival nagkanayon nga nag-umol na usab sila og balaod ni Konsehal Jocelyn Pesquera nga kinahanglang ang tanang subdivision sa siyudad adunay water catchment facility aron nga ang tubig uwan gikan sa ilang mga lugar dili molahos sa kadalanan o sa mga kanal tungod kay masawod kini sa water catchment facility.

Maghimo usab og technical working committee si Archival aron maoy motuon kabahin sa pag-ugmad sa water catchment facility ug sa lugar nga butangan niini. (BANAT NEWS)