Traffic tungod sa pista sa Jaclupan

CEBU, Philippines — Gilauman ang hinay nga dagan sa trapiko karong adlawa sa mga motorista nga moagi sa bukirang barangay sa Talisay human saulogon sa Barangay Jaclupan ang ilang kapistahan.

Sugod sa alas 9 sa buntag hangtud sa alas 12 sa udto ipahigayon nila ang Sinulog Street Dance. Diha sila manukad Sitio Ibo paingon sa Sitio Cambawog ug mobalik sa Mother of Perpetual Help Parish.

Ang City of Talisay-Traffic Operation Development Authority (CT-TODA) niawhag sa mga motorista nga gikan sa Dakbayan sa Toledo o gikan sa silingan nga lugar nga mangita lang una og laing kaagian aron dili matanggong sa trapiko. Nihangyo sab ang konseho sa barangay sa mga bisita nga magdala og sakyanan nga adto sila moparada sa ilang sakyanan sa bakante nga luna duol sa MCWD.

Gipasabot sa taga CT-TODA nga wala silay sirhan nga dalan pero dawat-dawat ang ilang himuon o puli-puli nga moagi ang mga sakyanan. (BANAT NEWS)