P15M shabu nasakmit sa CCPO

CEBU, Philippines — Subsob ang gihimong mga operasyon sa Cebu City Police Office (CCPO) pinangulohan ni acting city director Police Colonel Enrico Figuero batok sa tanang krimen sa bulan sa Enero.

Gikan sa Enero 1 hantod sa petsa 31, 2025 ang CCPO nagpahigayon og anti-crime operations ang CCPO nga miresulta sa pagkasikop sa 558 ka suspetsado nga nakalapas sa nagkalain-laing krimen.

Niabot sa P15.5 million nga balor sa illegal nga drugas ang nasakmit sa CCPO atol sa 175 ka simultaneous operations.

Nakasikop sab ang suspetsado og 256 ka indibidwal gumikan sa illegal gambling ug 36 ka loose firearms ang nakompiskar.

Nadakpan sab sa CCPO ang 71 ka wanted persons nga nagpakita sa ilang commitment sa nga mamentinar ang kahapsay ug kalinaw ilabi na nga nagkaduol na ang May 2025 National ug Local Elections.

"I am proud of the dedication and perseverance of our police officers in maintaining peace and order in the city....This intensified campaign is a testament to our commitment to serve and protect the public, and we will continue to work tirelessly to ensure the safety and well-being of our citizens," sigon ni Figueroa.                Samtang dul-an P2 milyones nga balor sa ginadili nga drugas ang nasakmit sa mga tinugyanan sa kapulisan sa Central Visayas pinaagi sa ilang gipahigayon nga Simultaneous Anti-Criminality Law Enforcement Operations kon SACLEO.

Dili mominos 12 ka operasyon ang ilang gihimo ug nasikop ang 16 ka mga tawo ug nakasakmit og 231.31 gramos nga gituohang shabu nga mobalor og P1,649,908.00

Dul-an sa usa ka libo ka pesos nga pusta sa ilegal nga sugal sa unom ka operasyon nga gihimo ang ilang nakumpiskar ug 12 ang nadakpan samtang unom ang napasakaan og kaso.

Usa ka most wanted ug 13 ka other wanted persons ang nadakpan ug siyam ang nasakmit nga loose firearms.

Dul-an sa P800,000  sab nakolektang multa gikan sa 1,300 ka mga tawong nakalapas sa nagkalain-laing ordinansa sa ilang mga lokalidad.

Sa pikas bahin, nagtingkagol karon sa prisuhan ang usa ka babaye nga high value individual human nadakpan sa buy-bust operation sa Tagbilaran City Police Station sa Bohol Police Provincial Office(BPPO) sa Purok 3, Barangay Dampas, Tagbilaran City niadtong Domingo sa gabii, Pebrero 2, 2025.

Ang dinakpan mao si Josephine Utlang, 44 anyos, nagpuyo sa Purok 5, Dao, Dauis, Probinsya sa Bohol.

Nakuhaan ang suspetsado og 155 gramos nga shabu nga nagkantidad og kapin sa P1 million.

Nasayran nga tulo ka semana nga gi-monitor sa Tagbilaran City Police Station ang suspetsado human makadawat og impormasyon nga kini nalambigit sa illegal nga kalihukan.  Giingong dili lang Tagbilaran City ang area of disposal niini apan apil na ang mga silingang munisipalidad.

Maka dispose matud pa ang suspetsado og 50 gramos nga shabu kada semana.

Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado. (BANAT NEWS)