Duha ka drayber sa motorsiklo patay sa bangga

CEBU, Philippines — Usa patay sa nahitabong disgrasya diha sa Barangay Yati, Lungsod sa Liloan kagahapon sa kadlawon.

Nalambigit sa disgrasya mao ang usa ka motorsiklo nga Honda Click nga gimaneho ni Junbert Quiapo Yaun, 22-anyos, taga Barangay Lamac, Lungsod sa Consolacion ug Isuzu Aluminum Van Elf nga gimaneho ni Romelito Nguho Laguido, 28-anyos, residente sa Barangay Paknaan, Dakbayan sa Mandaue.

Base sa imbestigasyon sa Liloan Police Station nga ang sakyanan ug motorsiklo nagbiyahe sa mananglahi nga direksiyon.

Ang van gikan kini sa Kapolay, Barangay Tayud, Lungsod sa Liloan ug padulong kini sa Bag-ong Dan sa Barangay Yati sa maong lungsod.  Samtang ang motorsiklo gikan sa corner Jugan, Lungsod sa Consolacion ug paingon kini sa Bag-ong Dan, Barangay Yati aksidente nga naigo niini ang walang bahin sa sakyanan.

Patay ang drayber sa motorsiklo samtang ang angkas niini giatiman sa mga medic.

Sa laing bahin, patay usab ang usa ka babaye nga nagmaneho usab og motorsiklo  human kini nabangga sa pader sa covered court sa Barangay Mancilang, Lungsod sa Madridejos sa niaging adlaw.

Ang biktima mao si Abegail Almodiel, 21, residente sa Barangay Malbago, Lungsod sa Madridejos, drayber sa scooter nga color gray.  Base sa taho sa Municipality Disaster Risk and Reduction Office (MDRRMO) sa Lungsod sa Madridejos nga ang biktima padulong  mouli sa ilang balay ug giingong nakainom kini samtang nagmaneho sa motorsiklo.

Gikataho nga gigukod kini og iro ug nakumot sa biktima ang gasolinador ug wala na makontrolar niini ang manobela sa motorsiklo ug nilahos kini ngadto sa pader.

Ang biktima kinsa na-deform ang ulo daling gidala ngadto sa Bantayan District Hospital apan gibalhin kini diha sa Visayas Medical Hospital ug gideretso sa intensive care unit (ICU) tungod kay kritikal na ang kondisyon sa biktima apan nakabsan gyud kini sa kinabuhi.

Samtang wala madayon sa pagpangaon ang managbarkada human ang ilang motorsiklo nga gisakyan nadasmag sa laing motorsiklo diha sa nasudnong dalan habig sa Barangay Tungha-an, Lungsod sa Minglanilla kagahapon sa kadlawon.

Ang nagmaneho sa motorsiklo mao si alyas “Dave”, 25, taga Barangay Calajo-an sa maong lungsod.

Samtang ang mga angkas niini nga iyang mga higala mao sila si alyas “Enting” ug alyas “Jay”.

Gikataho nga padulong unta mangaon diha sa Barangay Inayagan, Siyudad sa Naga ang mga biktima

Ug giingong pabor pa kanila ang signal sa traffic light apan usa ka motorsiklo nga Gimaneho ni alyas “Joseph” nikalit kini og butho hinungdan nga nagkabanggay ang duha ka motorsiklo.

Nangatumba ang motorsiklo ug nangalalabay ang mga sakay niini kinsa sila si Dave,  Jay ug Joseph nakaangkon og pangos sa lawas samtang si Enting nabalian sa iyang abaga.

Ang mga biktima gitabang kini sa Minglanilla Rescue Team ug gidala sa tambalanan.  — Anthony Despi, Gabriel C. Bonjoc (BANAT NEWS)