DOH: Maghinay-hinay sa pagkaon og unhealthy

CEBU, Philippines — Gipahinumduman sa Department of Health (DOH) ang mga Filipino sa paghinay-hinay sa pagkaon og unhealthy nga mga pagkaon sama sa mga parat, tambok ug tam-is, karong holiday season aron malikayan ang komplikasyon sa panglawas.

Base sa interview sa PTV Philippines, si DOH Assistant Secretary Albert Domingo nagkanayon nga ang mga klase sa pagkaon nga sobra ka parat, tambok, tam-is maoy hinungdan sa altapresyon, diabetes ug uban pang dili makatakod nga sakit sama sa obesity nga posibleng moresulta sa mga problema sa kasingkasing ug ubang bahin sa lawas.  Nunot niini, giawhag ni Domingo ang mga Filipino sa pag-obserba sa pasko sa himsog nga pamaagi pinaagi sa pagkaon og daghang prutas ug utanon kaysa sa bugas ug tambok nga karne.

Pahinumdom usab ni Domingo nga iapil usab ang ehersisyo ug disiplina sa panahon sa holidays.

Ug aron malikayan ang kapeligro sa pagkahilo sa pagkaon, ang DOH nipahinumdum  usab sa pag-obserba sa mga maayong gawi sa pagluto og pagkaon nga ihaon sa mga panagtapok sa pamilya ug mga party.

Matud ni Domingo nga importante nga ang mga presko nga ingredients sa mga utanon, isda ug karne ang gamiton sa pagluto og mga putahe.

Samtang, kong mag-take home og mga pagkaon gikan sa mga party pilion ang mga sinugba o pinirito kaysa adunay sabaw ug sarsa nga dali ra madaot o mapan-os.

Ang husto nga pag-andam ug pagtipig sa mga pagkaon importante usab aron dili kini dali nga madaot diin ang pagkaon mahimong tabonan ug ibutang sa refrigerator kong mabugnaw na. (BANAT NEWS)