DSWD-7 nakapahigayon og 20 rescue operations

CEBU, Philippines — Karong tuiga, 20 ka rescue operations batok trafficking in persons ang nabuhat sa Department of Social Welfare and Development (DSWD) Central Visayas.

Matud sa DSWD, kini nga mga operasyon nag-rescue sa mga victim-survivors sa commercial sexual exploitation of children (CSEC) o prostitusyon, online sexual abuse o exploitation of children (OSAEC) ug anti-child sexual abuse o exploitation materials (CSAEM), human trafficking sa Philippine Offshore Gaming Operations (POGO), ug sekswal nga pang-abuso sa mga bata.

Gitumbok ni DSWD-7 Regional Director Shalaine Marie S. Lucero alerto 24/7 ang ilang mga social workers pagresponde ug duna sab silay standard quality centers ug residential care facilities nga nagsilbing temporary shelters sa mga biktima.

Kanunay sab ang ilang koordinasyon sa mga ahensya nga nagpatuman sa balaod ug local government units (LGU's).

Matud sa ahensya naghatag kini og pagsalig sa publiko ug sa mga ahensya nga nagpatuman sa balaod nga ang mga victim-survivors mobati nga sila luwas, gipanalipdan, ug gipasaligan sa suporta sa gobyerno pinaagi sa DSWD.

Dugang pa, aduna silay sentro sa pagproseso aron masusi ang mga victim-survivors ug mahatagan og mga posibleng interbensyon samtang naghulat kung asa sila labing maayo nga ibutang, kun diin mabuntog nila ang ilang mga trauma, makakuha og rehabilitasyon, ug maandam sila sa luwas nga reintegration.

Pinaagi sa Recovery and Reintegration Program for Trafficked Persons (RRPTP), usa ka komprehensibong programa para sa gi-trafficked nga mga indibidwal, mga 215 ka indibidwal ang nakadawat og nagkalain-laing tabang sama sa psychosocial counseling, educational, livelihood, ug tabang medikal.

Samtang, pipila usab nila gi-refer alang sa admission sa mga sentro sa departamento ug residential care facilities, sama sa Home for Girls ug Regional Haven for Women, isip temporaryong kapuy-an.

Hangtud Nobiyembre 25, 2024, ang ahensya nagpagawas na og kinatibuk-ang PHP823,000 aron pondohan ang tabang nga gihatag pinaagi sa RRPTP.

Sa pikas bahin, ang DSWD, sa pakigtambayayong sa Inter-Agency Council Against Trafficking: Violence Against Women and Children (IACAT7-VAWC), nipahigayon og mga adbokasiya aron mapugngan ang human trafficking ug OSAEC, lakip ang pagpataas sa kahibalo sa mga focal personnel sa GAD/VAWC ug pagpasiugda og mas luwas nga internet campaign alang sa mga tinun-an sa high school. IBM BANAT NEWS