10 ka illegal nga estraktura sa Talisay ipaguba na
CEBU, Philippines — Miabot sa 10 ka ilegal nga estraktura sa duha ka barangay sa Dakbayan sa Talisay ang gikatakda nga gub-on.
Kini human ang sakop sa road clearing operation gimandoan sa Department of Interior and Local Government (DILG) aron mahawan ang mga estraktura nga nagbabag sa kadalanan.
Si Edwin Nierves, pangu sa road clearing operation nagkanayon gikinahanglan kini panahon sa emerhensya nga di malangay ang sakyanan nga magresponde o bisan man lang sa mga motorista nga di malangay sa biyahe.
Matud pa ni Nierves ilang gipadad-an og notisya ang mga nanag-iya sa ilegal nga estraktura aron paghangyo nga boluntaryo kini nga gub-on.
Asoy pa niya nga lima ang ilang natagaan og notisya gikan sa Barangay Poblacion samtang lima sab ang sa Tanke. Nakita ni Nierves nga adunay mga panimay nga gipadak-an hangtud nga nakalapas na sa sidewalk.
Gitagalan hangtud sa buwan sa Enero ang mga gipangtagaan og notisya aron ilang maguba ang nilapas nga estraktura. MEL BANAT NEWS
- Latest
