PSA: Inflation rate sa Central Visayas nikunhod og 2.3 porsyento

CEBU, Philippines — Nikunhod ang inflation rate sa Central Visayas ngadto sa 2.3 porsyento sa Nobiyembre 2024 gikan sa 2.9 porsyento niadtong Oktubre base sa taho sa Philippine Statistics Authority (PSA)-7. Uban sa average inflation rate nga 3.2 porsyento gikan sa Enero hangtud sa Nobiyembre 2024, kini ang ikaduhang bulan niining tuiga diin ang rehiyon nakatala og hinay nga pagsaka sa presyo sa mga goods ug services sunod sa bulan sa Septiyembre nga adunay 2.1 porsyento.

Ang nag-unang mga hinungdan niining pagkunhod mao ang hinay nga pagsaka sa presyo sa housing, tubig, elektrisidad, gas, ug gasolina nga nikunhod gikan sa 3.7 porsyento ngadto sa 1.1 porsyento ingon man ang pagkaon ug non-alcoholic beverages nga 4.0 porsyento gikan sa 4.4 porsyento.

Sa samang buwan natala usab hinay ang pagsaka sa grupo sa palaliton sama sa alcoholic beverages ug tobacco, clothing ug footwear, health, recreation, sport and culture, ug mga serbisyo sa restaurant ug akomodasyon.

Kabahin sa inflation sa pagkaon, nihinay kini sa 4.2 porsyento sa bulan sa Nobiyembre gikan sa 4.6 porsyento sa bulan sa Oktubre.

Ang nag-unang hinungdan mao ang hinay nga pagsaka sa presyo sa bugas nga 5.1 porsyento gikan sa 8.8 porsyento,  prutas ug nuts nga 5.3 porsyento gikan sa 12.6 porsyento, dairy products ug itlog nga 2.6 porsyento gikan sa 4.6 porsyento, mga karne nga 3.7 porsyento gikan sa 4.6 porsyento ug klour/bread nga 1.4 porsyento gikan sa 1.8 porsyento.

Matud ni Engineer Leopoldo Alfanta, Jr. PSA-7 chief statistical specialist nga usa sa mga factor nga nikunhod kini tungod sa normal nga kondisyon sa panahon hinungdan nga wala maapektohi ang produksiyon sa mga produkto sa agrikultura o ang kinatibuk-ang sektor sa agrikultura sa rehiyon.  Apan matud usab ni Alfanta nga posible ang pagsaka sa inflation rate sa mosunod nga buwan og karong buwanailabi na nga ang mga household makagasto sa pagpamalit ug ang pagbuto sa Bulkang Kanlaon posibleng makatampo sa pagsaka niini. BDB BANAT NEWS