Basic Education Mental Health Act gipirmahan na ni Marcos

CEBU, Philippines —  Gipirmahan ni Presidente Ferdinand “Bongbong” Marcos, Jr. ang Basic Education Mental Health and Well-Being Promotion Act kagahapon aron palapdan ug palig-onon ang mga programa sa mental health sa pampubliko ug pribadong mga tunghaan. 

Matud sa Presidential Communications Office (PCO) nga ang balaod nagtumong sa pag-establisar og mga School-Based Mental Health Program aron sa pagpataas sa kahibalo, pagtubag sa mga kabalaka ug pagpalambo sa suicide prevention alang sa mga estudyante sa batakang edukasyon ug sa mga teaching ug non-teaching personnel.

Lakip sa mga mahinungdanong probisyon sa balaod mao ang pag-institutionalize sa mga serbisyo sa mental health sama sa screening, evaluation ug monitoring sa mental well-being sa mga estudyante ingon man ang mental health first aid, crisis response, ug referral system.

Aron suportahan kini nga mga inisyatibo, ang Department of Education (DepEd) maoy responsable sa pagmugna og mga care center sa mga publikong eskwelahan ug pagsiguro sa paglungtad ug pagmentinar niini sa mga pribadong eskwelahan pinaagi sa pag-usab sa kasamtangang guidance offices ngadto sa mental health service hubs aron paghatag og personal nga suporta sa mga estudyante.

Ang balaod nagkinahanglan usab sa pagmugna og Mental Health and Well-Being Office sa matag school division office.

Subay niini, ang Department of Budget and Management (DBM) sa konsultasyon sa DepEd ug sa Civil Service Commission (CSC) maghimo og bag-ong plantilla positions alang sa mga school counselor.

Naglakip kini sa mga posisyon sama sa School Counselor Associate I hangtud sa V, School Counselor I hangtud sa IV ug Schools Division Counselor samtang ang existing items i-reclassify usab. (BANAT NEWS)