Mt. Kanlaon nag-alburoto napu

CEBU, Philippines — Giisa na ngadto sa Alert Level 3 ang Bulkang Kanlaon human sa pag-alboroto niini sa alas-3 sa hapon niadtong Lunes, Disyembre 9, sumala sa Department of Science and Technology (DOST)- Philippine Institute of Volcanology and Seismology (PHIVOLCS).

Base sa Kanlaon Volcano bulletin nga giisyu, usa ka eksplosibong pagbuto ang nahitabo sa summit vent niini ug nibuga og bagang aso pataas gibanabanang 3,000 metros gikan sa baba niini padung sa direksyon sa a west-southwest.

“The eruption produced a voluminous plume that rapidly rose to 3,000 meters above the vent and drifted west-southwest,” matod sa Phivolcs sa usa ka social media post.

Tungod niini, gipasaka sa DOST-PHIVOLCS ang Alert Level sa Kanlaon Volcano gikan sa Alert Level 2 (increasing unrest) ngadto sa Alert Level 3 (magmatic unrest).

Nagpasabot kini nga nagsugod na ang magmatic eruption nga posibleng mograbe pa ngadto sa mas kusog pa nga pagbuto.

Ang tanang local government units gitambagan sa pagbakwit sa 6-km radius gikan sa summit sa bulkan ug kinahanglang andam sa dugang evacuation kung kung magpadayon ang kalihukan sa bulkan.

Sa post sa Brigada News FM Toledo City, naabot na ang ashfall o abo gikan sa bulkan diha sa Bago City, Negros Occidental pipila ka minutos human sa pagbuto sa maong bulkan.

Usa ka residente sa lugar nga si Ser Alexander III ni-post og hulagway sa iyang bukton nga dunay namilit nga abo ug makita sa hulagway nga ang ilang lugar napuno na niini kagahapon pasado alas-3 sa hapon, Disyembre 9,2024.

Matud sa Office of the Civil Defense pinaagi sa Philippine Information Agency, nga agi'g tubag sa pagbuto, padayon nga gipatuman ang emergency evacuation efforts alang sa mga residente sulod sa unom ka kilometro nga radius sa bulkan, sumala sa girekomenda ni Asec. Alejandro.

Gibanabana nga dul-an sa 12,000 ka pamilya, o 54,000 ka indibidwal, sa tibuok Rehiyon 6 ug 7 ang maapektuhan. Sa Rehiyon 6, gibana-bana nga 20,000 ka indibidwal gikan sa 12 ka barangay ang gipaabot nga maapektuhan sa pagbuto.

Ang mga awtoridad nangandam alang sa pinakagrabe nga senaryo sa pagpataas sa alert level ngadto sa Level 4 kung gikinahanglan, nga magkinahanglan og dugang nga pagbakwit ug mga lakang sa kaluwasan.

Subay niana, ang Inter-Agency Coordinating Cell (IACC) i-reactivate ug gilangkuban sa mga representante gikan sa Department of Health (DOH), Department of Social Welfare and Development (DSWD), ug Department of the Interior and Local Government (DILG) aron epektibong makig-coordinate sa tubag sa mga paningkamot.

Samtang si Canlaon City Mayor Jose Chubasco Cardenas misuspende sa mga klase sa tanang lebel sa publiko ug pribadong mga tunghaan niadtong Lunes ug magpabiling ipatuman ang suspensyon sa klase sa Canlaon hangtod malibkas kini