Libreng insurance para sa habal-habal drivers pinaskuhan ni Garcia

CEBU, Philippines — Dili lang delivery drivers sa Dakbayan sa Sugbo ang makadawat og P100,000 nga insurance, lakip na sab ang dili momenus nga 4,000 ka mga habal-habal drivers.

Sa report sa Cebu City Public Information Office, gipahibalo kini ni Cebu City Mayor Raymond Alvin Garcia atol sa “Habal-habal Drivers Summit & Christmas Party” nga gipahigayon sa South Road Properties niadtong Disyembre 7, 2024. nga gipasiugdahan ni Konsehal Pastor “Jun” Alcover, Jr.

Kahinumdoman nga niadtong miaging buwan nisaad ang mayor nga hatagan ang mga delivery drivers og insurance nga gikan mismo sa iyang bulsa ug karon lakip na sab nga makatagamtam sa maong benepisyo ang mga habal-habal drivers.

Matud pa ni Garcia nga makakuha ang mga habal-habal drivers sa maong insurance kung makasumiter sila sa mga gikinahanglan nga mga resikitos.

Sa pagpakighinabi sa Banat News ngadto kang Alcover, kini miingon nga ang mga rekisitos  kinahanglan nga miyembro sa Cebu City Habal-Habal Drivers Association, usa kini ka botante sa dakbayan, kinahanglan adunay lisensya, barangay certification nga nagpamatuod nga usa kini ka habal-habal driver.  Kadtong gustong makadawat og insurance giawhag sila ni Alcover sa pagbisita sa iyang buhatan diha sa city hall.

Matud pa ni Garcia nga ang insurance dili ni gikan sa pundo sa siyudad o sa gobiyerno, gikan kini sa iyang kaugalingong bulsa ug mao kini ang iyang pinaskuhan kanila.

Matud pa nga life coverage ang maong insurance basta resulta lang sa aksidente ug kung maaksidente unya maospital, adunay hangtud sa P20,000 ang coverage niini. — /IBM (BANAT NEWS)