Disneyland sa Talisay gidumog sa mga tawo

CEBU, Philippines —  Gidumog sa ngaTalisaynon ang pagpasiga sa dayan-dayan sa kapaskohan sa Dakbayan sa Talisay niadtong Biyernes sa gabii. Gihimo sa siyudad nga ‘Disneyland-inspired Christmas decorations’ ang atubangan nga bahin sa Talisay City Hall.

Daghang kabataan nga misaksi uban sa ilang pamilya makakita lain-laing talan-awon nga makita sa Disneyland sama sa nilang Mickey ug uban pang mga karakter sa Disney.

Si Mayor Gerald Anthony “Samsam” Gullas nipadayag nga gusto niya nga malipay ang kabataan sa panahon sa Pasko mao nga iyaha kining nahunahunaan nga maoy ipabuhat nga dayan-dayan.

Dili tanan ang maka-afford sa pag-adto sa Disneyland, apan pinaagi sa gibuhat sa Talisay daghang mga kabataan ang makasinati niini bisan dinhi lang sa ilang lugar. Dunay mga bata nga nag-costume ug nagkalain-laing karakter diin ilang gipasigaan ang nagkalain-laing dayan-dayan.

Ang Christmas lighting sa Talisay gidungan sa pagpahigayon sa Christmas party sa nagkalain-laing buhatan.

Gumikan sa kadaghan sa tawo nga nanambong nakamugna gyud kini og trapik diha sa Barangay Mohon.  Sa pikas bahin,  giisip nga pangpawagtang sa stress ang paghimo og dekorasyon niining kapaskohan alang sa mga sakop sa Talisay City Disaster Risk Reduction and Management Office (CDRRMO).

Kini maoy gitug-an ni Joshua Mahinay, assistant training officer sa CDRRMO. Ang buhatan sa CDRRMO napuno sa mga dayan-dayan sa pasko kay nag iyahay man sila og pabonggahay.

Ang ilang gamit pulos mga recyclable nga materyales sama sa mga water bottle, ginit sa lubi, laya nga dahon ug uban pa.

Matud pa ni Mahinay nga pagpakita sab kini sa ilang talento sa pagdesinyo bisan paman og daghan sa ilang kawani mga lalaki. Siya nagkanayon nga human sa ilang pagtubag og alarma ayha pa sila  nag-dekorasyon.Karon nga Pasko ilang gipanghinaot nga wala silay alarmahan aron magsaulog silang tanan nga luwas ug malipayon.