Magtiayon Napunggit sa awto

CEBU, Philippines — Magtiayon nga nagsakay og motor napunggit sa usa ka awto, bana namatay samtang grabeng naangol ang asawa niini nga barangay kagawad sa usa sa mga barangay sa Lungsod sa Daanbantayan niadtong Huwebes.

Ang aksidente nahitabo diha sa atubangang bahin sa barangay hall sa Pajo nga nahimutang Bliss sa national highway  sa maong lungsod niadtong Huwebes sa buntag.

Ang magtiayong  biktima mao sila si Gilbert Doble Arrabis Sr., 76 anyos,  ug asawa nga si Barangay Kagawad Edelita Molejon Arrabis nga nag-angkas kaniya. Ang duha mga ginikanan ni kanhi Daanbantayan Vice Mayor Gilbert Arrabis Jr. nga konsehal na sa maong lungsod.

Samtang ang nakabangga kanila mao ang usa ka Toyota Vios nga gimaneho ni Kyle Neilsen Sastre, 26-anyos, taga DAR, Bitoon sa mao gihapong lungsod.

Matud ni Police Major Mark Anthony Villanueva, hepe sa Daanbantayan Police Station, kusog ang padagan sa Toyota Vios gikan sa Poblacion paingon sa DAR, Bitoon, samtang ang motorsiklo paingon sa amihanan gikan sa Pajo.

Pag-abot dapit sa Pajo Barangay Hall, niliko sa wala ang motorsiklo paingon sa sa barangay hall apan adtong tungora nabanggaan sila sa maong awto. Tungod sa kakusog sa pagbangga nalagpot ang magtiayon ngadto sa sementadong karsada.

Daling gidala sa mga sakop sa Municipal Disaster Risk Reduction and Management Office (MDRRMO)  ang magtiayon sa Daanbantayan District Hospital, apan si Arrabis Sr. gideklarar nga dead on arrival tungod sa grabeng kadaut sa ulo nga iyang naangkon samtang  pabiling giatiman sa tambalanan ang iyang kapikas. Matud ni Villanueva si Sastre anaa pa sa state of shock hangtod karon tungod sa panghitabo.

Temporaryo siyang gi-detain sa police station samtang giandam sa kapolisan ang pagpasaka og mga kasong Reckless Imprudence Resulting to Homicide, Serious Physical Injury, ug Damage to Property. Romeo Limpangog/IBM BANAT NEWS