LTO nisuspenso sa polisiya pagdili sa improvised plates

CEBU, Philippines — Ang Land Transportation Office nisuspenso sa ilang gipagawas nga polisiya nga  nagdili sa paggamit og improvised plates.

Niadtong Miyerkules, ang LTO nagkanayon nga ang pagpatuman sa Memorandum Circular (MC) VDM-2024-2721 ug MC VDM-2024-2722 gisuspenso sukad niadtong Septiyembre 30, 2024 until further notice aron mahatagan og dugang panahon ang mga tag-iya og sakyanan sa pagkuha sa ilang mga plaka.

Si Senate Majority Leader Francis Tolentino nagkanayon nga ang desisyon sa LTO kadaogan alang sa mga motorcycle riders.

"The suspension of its December 31 deadline by LTO 'until further notice' provides relief for motorcycle riders affected by the massive license plate backlog. It will allow them to go about earning a living without the threat of being apprehended and fined", matud ni Tolentino.

Sayo pa, si Tolentino nikwestiyon sa kontrobersiyal nga VDM-2024-2721 sa LTO ug nanawagan sa rehiyonal nga buhatan sa LTO sa Sugbo alang sa pagpaningil sa mga rider og P40 nga bayronon aron makakuha og permit.

"In my inquiries, the LTO admitted that even with their plate manufacturing machines working at full capacity, the agency won't be able to meet its production backlog for license plates until July 2025”, padayag ni Tolentino.

Si Tolentino maoy principal author sa giaprobahan nga Senate Bill 2555 nga nagtinguha sa pag-amendar sa discriminatory provisions sa Akta Republika 11235 kun ang “Doble Plaka (Double Plate) Law”, batok sa motorcycle riders.

Base sa taho sa Philippine News Agency (PNA) atol sa ilang tigom niadtong Martes ang Motorcycle Taxi Community Alliance (MTCA) nipahibawo kang Tolentino nga pipila na kanila ang nagpaabot sa ilang mga plaka sulod sa pipila ka tuig.

Samtang si LTO Executive Director Greg Pua nagkanayon nga ang pagkalangay sa katumanan sa backlog sa LTO sa mga plaka tungod kini sa kakuwang sa budget ug pagkalangay sa produksiyon bisan pa sa hingpit nga paghatud sa mga plaka ngadto sa planta sa paghimo og plaka sa LTO.

Si Pua nipasalig nga ang ahensiya nagtrabaho sa triple nga oras aron matubag ang atraso sa mga plaka sa motorsiklo ug nagtinguha nga makab-ot ang zero backlog sa Hunyo sa sunod tuig. BDB BANAT NEWS