17 ka lungsod ni-upgrade ngadto sa 1st income class municipality

CEBU, Philippines — Niabot sa 17 ka lungsod sa Probinsiya sa Sugbo ang nahimo na karon nga 1st income class municipality base sa tinuig nga income o kita niini nga gi-certify sa Department of Finance.

Apil sa mga ni-upgrade nga mga lungsod ngadto sa first income class municipality mao ang Asturias gikan sa 3rd class municipality; Badian gikan sa 3rd class; Barili gikan sa 2nd class; Carmen gikan sa 3rd class; Compostela gikan sa 3rd class; Cordova gikan sa 3rd class; Dumanjug gikan sa 3rd class; Madridejos gikan sa 4th class; Medellin gikan sa 2nd class;  Moalboal gikan sa 4th class; Oslob gikan sa 4th class; Pinamungajan gikan sa 2nd class;  San Fernando gikan sa 2nd class, San Francisco gikan sa 3rd class; San Remigio gikan sa 3rd class; Sibonga gikan sa 3rd class ug Tuburan gikan sa 2nd class municipality.

Matud sa DOF nga ang mga munisipyo nga adunay dili mo menus P200 milyones nga average annual regular income classify nga first income class municipality.

Ang mga lungsod sa Argao, Balamban, Bantayan, Consolacion, Daanbantayan, Dalaguete, Liloan ug Minglanilla maoy mga munisipyo nga na-retain o nagpabilin gihapong nga first class municipality.

Sa kinatibuk-an niabot sa 25 ka munisipalidad sa Probinsiya sa Sugbo ang first income class municipality.

Nunot niini, ang mga munisipalidad nga ni-upgrade na ngadto sa second income class mao ang Boron, Catmon, Sogod, ug Tabuelan nga gikan sa 4th income class samtang ang Tabogon gikan usab sa 3rd income class apil karon sa mga bag-ong 2nd income class municipality diin ang average annual income niabot sa dili mo menus P160 milyones ug dili moabot ngadto sa P200 milyones.

Ang mga lungsod sa Alegria, Aloguinsan, Poro ug Santa Fe nga gikan tanan sa 4th class municipality ang nahimo na usab karon nga 3rd income class municipality diin ang annual income niini niabot sa P130 milyones.

Samtang ang mga 4th class municipalities mao ang mga lungsod sa Alcantara, Alcoy, Boljoon, Ginatilan, Malabuyoc, Ronda, Samboan, Santander ug Tudela diin ang ilang annual income anaa sa P90 milyones ug dili molapas sa P130 milyones.

Ang Lungsod sa Pilar nagpabilin kini nga 5th class municipalty nga ang tinuig nga kita ubos sa P90 milyones.

Sa mga siyudad, ang highly-urbanized cities sa Cebu, Lapu-Lapu ug Mandaue nagpabilin gihapon nga first income class diin ang tinuig nga kita niini P1.3 bilyones.

Ang siyudad sa Talisay ug Toledo nga parehong gikan sa 3rd class cities, ang nahimo na karon nga first class cities.

Ang Dakbayan sa Danao, na-upgrade usab gikan sa 3rd class ngadto na sa 2nd income class city nga adunay P1 bilyon nga kita sa tuig.

Ang mga siyudad sa Carcar ug Naga nahimo usab nga 3rd income class cities gikan sa 5th class citiy.  Ang Bogo mi-upgrade usab gikan sa 6th class ngadto sa 5th class city nga adunay P500 milyones ang tinuig nga income.  BDB BANAT NEWS