No permit, No daygon sa Cebu City
CEBU, Philippines — Dili na unya basta nalang makapanaygon ang mga manaygonay karong nagsingabot nga Pasko dinhi sa Cebu City kun wala silay permit, samtang pamultahon ang masakpang mihatag og limos sa mga makililimos.
Ang Cebu City Anti-Mendicancy Board mipahibalo kagahappon sa press conference nga hingusgan na usab nila ang kampanya batok sa mga libudsuroy ug makililimos sa kadalanan.
Gipahibalo sab nila nga kinahanglan nga magkuha og permit gikan sa Business Permit Licensing Office (BPLO) o sa Office of the Mayor ang gustong manaygon sa mga kabalayan, mga buhatan ug mga tindahan.
Tumong niini ang seguridad sa mga manaygunay ug sa mga residente nga panaygunan.
Matud pa ni Dr. Lucelle Mercado , pangu sa Anti-Mendicancy Board nga silotan ang mga manaygon ug ang mohatag kun mapakyas sila sa pagsunod sa ordinansa. Ang makalapas makamulta og tag P1000 o kaha paserbisyuhon.
Samang si Raquel Arce, pangu sa Cebu City Transportation Office nga dili tugotan ang pagpanaygon sa kadalanan.
Ang mga menor de edad nga maglibud-suroy hipuson apil na kadtong mokabyon sa mga pasaheroan aron manaygon, kadtong mga magtabuk-tabok sa kadalanan. Apan ang mga hamtong na ang pangidaron nga makit-ang nanaygon o nagpakilimus pamultahon kini o kaha adunay ipahigayon nga community service. Giawhag ni Arce ang mga drayber nga kung adunay manaygunay nga mosaka sa ilang jeep, ipahunong kini sa pinakaduol nga traffic enforcer ug ang enforcer na maoy bahala niini. Hugot sab nga gisuportahan ni Mayor Raymond Alvin Garcia ang lakang sa mendicancy board aron nga mas hapsay ang kadalanan karon nga hapit na ang Pasko.
Dugang pa ni Garcia nga mas ipasayon niya ang proseso sa pagkuha sa permit alang sa mga lehitimo nga mga manaygunay. (BANAT NEWS)
- Latest
