Riprap sa Butuanon River sa Mandaue nahugno

CEBU, Philippines — Nahugno ang riprap nga kabahin sa P127 milyones nga flood control project sa Butuanon River sa Barangay Maguikay sa Siyudad sa Mandaue.

Ang maong flood control project maoy kabahin sa gigama nga proyekto ni Kongresista Emmarie “Lollypop” Ouano-Dizon sa nasudnong kagamhanan nga gipatuman sa DPWH alang sa pagsulbad sa mga nasinati nga pagbaha.

Si Engr. Gumer Castillo sa DPWH 6th Engineering Office miingon nga nagdistino na kini og mga personnel sa iyang buhatan nga mohimo og pakisusi kon ubos ba kini sa rehiyonal nga buhatan.

Ang nahugno mao ang riprap nga mga bato nga mao unta ang makapugong sa pagdahili sa yuta ug pagpugong sa mahitabo nga pagbaha. Si Victoria Cortes sa City Public Information Office (PIO) miingon nga ilang gikunsidirar ang pagpadala og structural engineers sa pagsiguro nga ang gipatuman nga proyekto sa Siyudad sa Mandaue luwas kini ug dili mamiligro ang kinabuhi sa mga Mandauehanon. — MEL BANAT NEWS