German national natigbasan sa silingan

CEBU, Philippines — Usa ka German national ang natigbasan sa iyang silingan niadtong Lunes sa buntag diha sa Purok 1, Barangay Atabay, Lungsod sa Alcoy.

Ang biktima giila sa kapolisan nga si Bernd Stefan Kordon, 61-anyos, German national, nagpuyo sa maong dapit samtang ang suspetsado mao si Rolando Debulosan, 64- anyos, minyo, mag-uuma.

Si Kordon nakaangkon kini og mga samad tinigbisan sa tuong kamot ug bitiis.

Base imbestigasyon sa kapolisan sa Lungsod sa Alcoy nga hubog niadtong higayona si Kordon ug giingong nagmaoy kini ug gipamutol ang 18 ka punoan sa saging ni Debulosan.

Nireklamo si Debulosan ngadto sa barangay ug gipatawag si Kordon ug niadtong Martes ang schedule sa ilang panag-atubangay human nakadawat og summon si Kordon niadtong Lunes.

Gi-verify ni Kordon kon tinuod ang summon ug dihang nasuta nga tinuod kini wala  mo pirma ang maong langyaw.

Sa pagpauli ni Kordon naagian niya si Debulosan nga nagtikad sa gitanom nga saging ug giingong giduol kini sa langyaw ug gisumbag ug naigo ang baba.

Gamit ang sanggot, nidepensa sa iyang kaugalingon si Debulosan ug gitigbas niya si Kordon sa kamot ug tiil.

Gidala sa duol nga tambalanan ang langyaw apan gibalhin kini sa Vicente Sotto Memorial Medical Center tungod kay operahanan kini.

Si Debulosan ni-surrender kini ngadto sa mga polis human sa maong hitabo. (BANAT NEWS)