“Premature campaigning” bantayan human sa filing sa COC

CEBU, Philippines — Giklaro sa Regional Director sa Commission on Elections (COMELEC) nga ang "premature campaigning" mahimo lamang nga mahukman human ang usa ka aspirant moduso og opisyal nga Certificate of Candidacy (COC).

Mao kini ang giklaro ni COMELEC Regional Director Francisco Pobe dihang gipangutana kon makonsiderar na ba nga premature campaigning ang proclamation rally ni mayoral aspirant, Yogi Felimon Ruiz sa Compania Maritima.

Matud pa ni Pobe nga ang premature campaigning gi-decriminalize na o gi-regulate sa COMELEC base sa existing nga desisyon sa Korte Suprema ni Rosalinda A. Penera batok sa COMELEC.

Dugang pa niya nga gikan sa Oktubre 1 hangtud 8, nga maoy gidugayon sa pag-file sa COC, hangtod sa dili pa magsugod ang campaign period nga magsugod karong Marso 28, 2024 alang sa mga lokal nga opisyal, ang mga mi-file makonsiderar lang nga aspirants og dili pa mga kandidato.

Kini nagpasabot nga hangtud nga ang usa ka aspirant mo-file og COC, bisan unsa nga panagtapok dili mahimong kalapasan sa election code.

Sa laing bahin si Pobe niingon nga ang ilang crackdown alang sa premature campaigning magsugod sa higayon nga mahuman na ang filing sa COC ug sa higayon nga magsugod na ang election period.

Gipahinumdoman dayon niya ang mga opisyal nga maghulat sa panahon sa kampanya aron mahimo ang usa ka "fair and square" nga election battle.

Gikataho nga giluwatan sa COMELEC ang gikatakdang mga activities alang sa 2025 mid-term national ug local elections.

Ubos sa Resolution No. 10999, gitakda sa Comelec en banc ang election period gikan sa Enero 12 ngadto sa Hunyo 11, 2025. Ang 90 ka adlaw nga campaign period alang sa mga national nga kandidato magsugod alang sa senador ug party-list, sa Pebrero 11 hangtud Mayo 10 sa 2025.

Ang Comelec niingon nga ang mga lokal nga aspirants adunay 45 ka adlaw sa pagpangampanya gikan sa Marso 28 hangtud Mayo10. — /MEL (BANAT NEWS)