Biktima sa ‘paluwagan’ scam

CEBU, Philippines — Nangayo og tabang sa buhatan sa Mayor sa kagamhanan sa Dakbayan sa Sugbo ang pipila ka mga investors sa “Palit-Dawat-Paluwagan” Investment nga matud pa usa ka magtiayong magtutudlo ang nagpasiugda niini.

Ang gireklamong magtiayong magtutudlo pareho nga nagtudlo sa Pardo National High School sa Cebu City. Gipugngan una sa Banat News ang mga pangalan sa duha samtang wala pa sila makuhai sa ilang habig. Ang mga biktima nagdumili sa pagbutyag sa ilang tinuod nga mga pangalan gumikan kay matud pa gipangbaharan sila nga ipangkiha tungod kay mikatap na sa social media nga silang nang-scam.

Usa sa mga nabiktima ang  matud pa gikasohan og 11 ka kaso nga cyber libel gikan sa babayeng magtutudlo tungod sa iyang pag-post sa iyang reklamo.

Giingong dili ra ordinaryong indibidwal ang nang-reklamo duna say unom nga kauban nga nga magtutudlo ug ang uban mga OFWs. Ang unom ka nabiktimang magtutudlo  nipasaka na og kasong estafa ngadto korte ug didto sa Professional Regulatory Commission (PRC) batok sa duha.

Sa pagpakighinabi sa Banat News sa usa sa mga biktima kini nibutyag nga nagsugod sila og invest niini niadtong Mayo 2023 ug nipasalig ra sab sila nga mo-invest og dakong kantidad gumikan kay makita nila nga “reliable” kini tungod kay mga propesyonal kini nga mga magtutudlo.

Giangkon sa pipila sa mga reklamante nga sa sinugdanan nakakobra gyud sila og ginansya, ang P100 mil nahimong P120 mil. Gituohang P300 milyones na ang kantidad nga na-scam sa magtiayon  basi sa pagbanabana sa 24 ka mga nabiktima sa ilang “Paluwagan.” Giingong adunay usa nga dul-an P2 milyones na iyang na-invest samtang duna say uban nga tag P500 mil.

Mialegar ang mga reklamante nga nabantayan nila nga walay laing pangita ang magtiayon gawas sa pagtudlo sa pampubliko nga tunghaan , mapan daghan na sila og naangkon nga mga katigayunan sama sa lima ka sakyanan, unom ka balay ug aduna na say tagsa ka insurance ang upat nila ka anak.

Nakurat nalang silang mga investors niadtong Disyembre 2023 sa dihang nikalit lang ni post sa ilang group chat ang duha nga matud pa nga nahugno na ang ilang nasugdang negosyo.

“Sa una pa, ni-declare sila nga mao ni ilang utang sa amoa unya ibalik niya among kwarta apan kadugayan mura na man og way klaro, wala gyud sila nakig-settle sa amoa og tinarong mao nga napugos mi nga moadto sa barangay,” suma pa sa usa ka biktima.

Ang mga biktima ug ang mga gireklamo nag-abot na sa barangay hearing sa makatulo nga higayon apan matud pa sa mga biktima nga gibaharan silang tagsa-tagsaon sila og pasakaan og kasong cyber libel sa babayeng magtutudlo tungod sa mga dili makiangayon nga komento niini sa social media sama sa giingnan kini og “bati’g nawong.”

Si Business Permit Licensing Office Executive Secretary Atty. Jared Limquiaco kinsa maoy miatubang sa mga mibiktima miingon nga ang mabuhat sa kagamhanan mao ang pag-assist ug pagduso og kasong large scale estafa sa piskalya ug ipaubos og imbestigasyon ang magtiayong magtutudlo ug posible sab nga ma-dismiss ang duha sa ilang serbisyo. Gitabangan sab sila aron maatiman sa Public Attorney’s Office (PAO). — IBM BANAT NEWS