Kaso sa dengue sa siyudad mitala na og 764

CEBU, Philippines — Moabot og 764 ang kaso sa dengue nga natala City Health Department (CHD) ug 10 niini ang kumpirmadong patay base sa report niadtong Septiyembre 16, 2024.

Si Dra. Daisy Villa misaysay nga “alarming” na ang maong gidaghanon kun itandi niadtong miaging tuig nga anaa lang sa 30 ang kaso.

Matud pa ni Villa nga ang tinubdan sa pagsaka sa kaso sa dengue mao ang sagunson nga pag-uwan ug ang posible nga pagsulod sa La Niña nga nagsugod pa niadtong Hunyo.

Ang CHD nagpatuman na og preventive measures aron malikayan ang pagsaka sa kaso sama sa search-and-destroy operations sa nagkadaiyang barangay ilabi na kadtong mga barangay nga adunay labing daghan og natala nga kaso diin nasuta nga adunay gyuy breeding grounds ang carrier sa dengue fever nga mao ang Aedes Aegypti mosquito.

Ang operasyon nga search and destroy usa kini sa “4S” strategy sa Department of Health aron masugpo ang kaso sa dengue sa mga barangay.

Dugang strategy mao ang “secure self-protection” measures, “seek early consultation” ug “support indoor and outdoor spraying”.

Gidasig ni Villa ang katawhan nga manglimpyo sa palibot ilabi na sa posibleng breeding grounds sa mga lamok diin mas maayo walay ipundo nga tubig.

Samtang naalarma ang Talisay City Health Office sa pagsaka sa kaso sa dengue sa buwan sa Agusto.

Si Dr. Lino Alanzado, pangu sa City Health Office nagkanayon nga sa pagtungtong sa buwan sa Agusto nisutoy ang gidaghanon sa kaso gikan sa napulo ngadto sa 25 ka kaso sa miaging mga buwan, nadugang ang 58 ka kaso sa buwan sa Hulyo ug Agusto.

Nisumada na ang kaso sa dengue sa Talisay sa 130.

Suma ni Alanzado nga subsob na ang ilang misting sa mga lugar nga adunay mga kaso sa dengue. — MEL BANAT NEWS