Interchange design alang sa SRP gipaabot nga iduso sa DPWH

CEBU, Philippines — Kagamhanan sa Dakbayan sa Sugbo nagpaabot nalang sa iduso nga interchange design sa Department of Public Works and Highways nga maoy ipatuman sa South Road Properties inay sa naandan nga roundabout.

Kini ang gibutyag ni Konsehal Rey Gealon kinsa maoy pangulo sa South Road Property Board.

Matud pa ni Gealon, nagkatigum na sila uban sa kadagkuan sa Department of Public Works and Highways ug ila nang natuki ang kabahin sa plano nga roundabout sa maong dapit sa SRP.

Nagpaabot nalang usab sila sa Technical department sa DPWH nga maoy mohimo sa design sa interchange nga maoy haum sa maong dapit inay sa roundabout.

Gitug-an ni Gealon, isip gitudlo ni acting Mayor Raymond Alvin Garcia nga modumala sa SRP mohangyo gayud sila nga mapatuman ang maong roundabout sa SRP kay makatabang gayud kini sa traffic sa maong lugar hilabi na hapit na mahuman ang arena.

Gipaabot nalang nila ni Gealon, ang interchange nga desinyo nga iduso sa DPWH nga maoy nihimo sa feasibility study ug andam gayud sila sa pagtabang unya aron kung mapatuman ang proyekto dili kaayo masinati ang grabe nga traffic.  Positibo si Gealon nga mapatuman gayud ang maong proyekto ilabi na pabor usab ang kadagkuan sa DPWH. — MEL BANAT NEWS