Tag-iya sa motorsiklo nga gigamit sa pagpanulis  ni-surrender

CEBU, Philippines — Nitahan sa iyang kaugalingon sa niaging adlaw ngadto kang Ermita Barangay Captain Mark Rizaldy Miral ang 27-anyos nga lalaki nga tag-iya sa motorsiklo nga giingong gisakyan sa mga tulisan sa pagpanulis.

Si Richard Calunsay ayas “Etchay”, residente sa nahisgutang barangay ang gipangita sa kapolisan tungod kay giingong apil kini sa pagpanulis ngadto sa 20-anyos nga biktima diha sa F. Pacaña Street, Barangay Tisa, Siyudad sa Sugbo.

Si Calunsay giingong maoy tag-iya sa motorsiklo nga gigamit sa pagpanulis ug giingong lider sa grupo nila ni Jessie Cañete kinsa unang nadakpan sa kapolisan.

Si Calunsay nihimakak sa maong pasangil batok kaniya ug nangangkon kini nga diha siya sa ilang balay dihang nahitabo ang insidente sa pagpanulis ug makapamatuod niini ang iyahang kapuyo nga niadtong higayona gisakitan siya sa ngipon ug wala nilakaw.

Apan positibo nga giila si Calunsay sa biktima nga maoy nanulis kaniya ug maoy drayber sa motorsiklo. Giangkon ni Calunsay nga kaila sila ni Cañete tungod kay pulos sila mga drayber sa e-bike.

Si Police Major Eraño Regidor, hepe sa Labangon Police Station nagkanayon nga si Cañete maoy nitug-an nga si Calunsay ang iyang drayber sa ilang pag-ikyas human makapanulis. — BDB BANAT NEWS