Konseho naghulat sa mga dokumento sa SB 3

CEBU, Philippines — Kasamtangang naghulat ang konseho sa Dakbayan sa Sugbo sa mga dokumento sa ikatulong supplemental budget (SB 3) karong tuiga gikan sa Local Finance Committee.

Si Konsehal Noel Wenceslao nagkanayon nga ilakip sa maong budget ang first tranche sa salary adjustments alang sa mga kawani sa city hall.

Naglaom si Wenceslao nga unta masumiter na ngadto sa konseho ang SB 3 karong semanaha aron ipaubos na kini og deliberasyon.

Matud ni Wenceslao nga ang SB 3 magsilbi nga pagtuman sa Executive Order 64 nga giisyu ni Presidente Ferdinand “Bongbong” Marcos, Jr. ug napirmahan na niadtong Agosto 2, 2024 ang maong EO nga maghatag og umento sa suholan sa mga trabahante sa gobiyerno ug dugang allowance alang sa mga empleyado sa estado sa upat ka tranches hangtud sa tuig 2027.  Ubos sa EO, ang umento sa suholan sa mga trabahante sa local government units kinahanglang awtorisado sa ilang tagsa-tagsa ka konseho sa munisipyo ug siyudad lakip na ang provincial boards. Matud usab ni Wenceslao nga ang mga regular ug casual nga empleyado sa city Hhall gilaoman nga makabenepisyo sa higayon nga mapatuman na ang SB 3.

Gani, ang unang tranche sa salary adjustments alang sa mga empleyado sa city hall retroactive usab.

“At least naa say mapaabot ilabi na atong mga regular ug casual employees nga nanghinaot nga masakaan ang atong income kay medyo nagkataas man sad atong pamaliton ug cost of living”, padayag ni Wenceslao. (BANAT NEWS)