Suholan giusbawan og P33 ug P43
CEBU, Philippines — Giaprubahan sa Regional Tripartite Wages and Productivity Board ang P33.00 ngadto sa P43.00 nga usbaw sa basic pay sa mga minimum wage earners nga mga mamumuo sa pribadong sektor sa Central Visayas.
Ubos sa Wage Order No. ROVII-25, ang bag-o karong minimum wage rate/rates sa Region VII: Sa Class A (Carcar, Cebu, Danao, Lapu-Lapu, Naga, Talisay ug kalungsoran sa Compostela, Consolacion, Cordova, Liloan, Minglanilla, San Fernando o Expanded Metro Cebu gikan P468.00 himuon na kining P501.000 o usbaw nga P33.00 kada adlaw.
Sa sektor sa pamuo nga nalambigit sa agrikultura ug non- agriculture establishments nga di makaabot og napulo ka empleyado, ang suholan gikan sa P458 mahimo sab nga P501.00 o usbaw nga P43.00 kada adlaw.
Para sa Class B naglangkob sa mga siyudad sama sa Bais, Bayawan, Bogo, Canlaon, Dumaguete, Guihulngan, Tagbilaran, Tanjay, ug Toledo gikan sa P430.00 nga suholan himuon na kining P463.00 kada adlaw. Sa agriculture ug non- agriculture establishments nga wala kaabot og napulo ka empleyado gikan P425.00 himuon kining P463.00 o usbaw nga P38.00 kada adlaw.
Sa Class C nga gilangkuban sa mga munisipyo nga wala maapil sa Class A ug Class B, gikan P420.00 himuon kining P453.00 o usbaw nga P33.00 kada adlaw. Sa agriculture ug non- agriculture establishments nga wala kaabot og napulo ka empleyado ang suholan nga P415.00 himuon ng P453.00 kada adlaw.
Kining bag-ong wage order moepekto karong Oktobre 2, 2024 o 15 ka adlaw human mapublikar sa pamantalaan. Kining kamandoan napublikar sugod karong adlawa sa igsuong pamantalaan sa Banat News nga The Freeman, September 16, 2024. Ubos sa Section 3 sa maong kamandoan, ang minimum wage rates epektibo sa normal nga walo ka oras nga trabaho kada adlaw.
Mag-atubang og kasong paglapas sa Section 12 of Republic Act No. 6727, as amended by RA No. 8188 ang si bisan kinsa nga dili motuman sa bag-ong wage rates .
Ang bag-ong wage order giaprubahan niadtong Septiyembre 6, 2024 sa unom ka miyembro sa RTWPB-7; ang upat nila mao silang Atty. Nora Analyn Demetrio-Diego ug Antonio Cuizon sa workers’ sector; ug Atty. Joseph Tanco ug Philip Tan sa mga magpapatigayon; Jennifer Bretaña (regional director sa National Economic Development Authority-7) ug Maria Elana Arbon (regional director of the Department of Trade and Industry-7); ug Lilia Estillore (regional director of the Department of Labor and Employment-7) kinsa maoy nagsilbing RTWPB-7 chairperson. (BANAT NEWS)
- Latest
