Lugar sa Visayas gipaubos sa Signal no. 1 tungod ni Enteng

CEBU, Philippines — Nikusog gamay ang tropical depression nga Enteng samtang nanguso kuso sa kadagatan sa amihanang-silangan sa Northern Samar.

Base sa alas 5 sa hapon kagahapon Septiyembre 1 nga cyclone bulletin sa Philippine Atmospheric, Geophysical, and Astronomical Services Administration (Pagasa), ang maong bagyo nasigpatan 100 kilometro sa amihanang-silangan sa Catarman, Northern Samar o 115 kilometro sa Silangang bahin sa Virac Catanduanes.

Ang maong bagyo adunay gikusgon nga hangin nga 55 kilometro matag takna samtang ang paghuros anaa sa 70 kilometro matag takna samtang nag-irog amihanang bahin.

Tungod sa tropical depression nga Enteng pipila sa mga lugar sa Visayas ang gipaubos sa Tropical Cyclone Wind Signals (TCWS) No. 1. Apil na niini ang Northern Samar, Samar, Eastern Samar, Biliran, ug ang northeastern portion sa Leyte (Babatngon, San Miguel, Tacloban City, Alangalang, Santa Fe, Palo, Barugo).

Sa Luzon, ang habagatang-silangan bahin sa Cagayan (Baggao, Peñablanca), silangang bahin sa  Isabela (Palanan, Dinapigue, Divilacan, San Agustin, San Guillermo, Jones, Echague, San Mariano, Maconacon, San Pablo, Cabagan, Tumauini, Ilagan City), habagatang bahin sa Quirino (Nagtipunan, Maddela), amihanang bahin sa Aurora (Dilasag, Casiguran, Dinalungan, Dipaculao, Baler), Polillo Islands, ug ang habagatang bahin sa mainland Quezon (Tagkawayan, Guinayangan, Buenavista, San Narciso, Mulanay, San Andres, San Francisco, Lopez, Calauag, Catanauan, Gumaca, Macalelon, General Luna, Quezon, Alabat, Perez), Camarines Norte, Camarines Sur, Catanduanes, Albay, Sorsogon, ug Masbate incuding Ticao ug Burias Islands ang apil pud sa TCWS number one.

Ang TD Enteng giforecast sa Pagasa nga moirog sa amihanang bahin hangtud karong buntag Septiyembre 2 ug posibleng mo land fall sa bahin sa Catanduanes o Albay sa mosunod nga 12 oras.

Tungod sa maong kalamboan gipahimangnoan sa state weather bureau ang publiko ug ang mga disaster risk reduction and management offices nga concern nga mohimo og lakang aron nga dili magrabehan sa epekto sa maong bagyo ilabina sa kinabuhi ug mga propedad.  — /MEL (BANAT NEWS)