Reward system ipasusi

CEBU, Philippines — Gimando ni Philippine National Police (PNP) Chief Police General Rommel Francisco Marbil ang paghimo og imbestigasyon bahin sa giingong “quota” ug “reward system” nga gipatuman sa kapolisan atol sa kampanya batok sa ilegal nga drugas  ubos Oplan Double Barrel nga gipatuman sa administrasyong Duterte.

Sa usa ka pamahayag kagahapong adlawa, Domingo, si Marbil mibutyag nga seryuso ug bug-at ang mga alegasyon nga gibuhian ni Police Lieutenant Colonel Jovie Espenido nga matud niya nakamugna og kabalaka sa publiko.

Tungod niini, gusto ni Marbil nga imbestigahon ang alegasyon aron gamitong tamdanan sa oversight bodies sa PNP sa paghimo og mga polisiya.

Ang review panel nga gipangulohan sa Office of the Deputy Chief PNP for Operations (ODCO) ug gilangkuban sa PNP Quad Staff, Internal Affairs Service (IAS), ug Human Rights Office maoy gitahasan sa hingpit nga pagsusi ug pagtuki sa Oplan Double Barrel, lakip na ang mga pagbutyag ni PLTCOL Espenido.

Lakip sa susihon sa panel ang tanang aspeto sa anti-drug campaign, pagtutok sa tawhanong katungod, operational protocols, ug accountability mechanisms aron maseguro nga ang nangaging mga operasyon nagsubay sa legal ug ethical standards, sumala sa gipasiugda sa PNP Chief.

Una niini, daghan ang mireklamo sa war on drugs ni Duterte human adunayn mga inosenteng tawo nga napagan, dunay nangapriso ug duna say nakalas.

Si Espenido namahayag atol sa quad committee hearings may labot sa matud pa extrajudicial killings nga nahitabo atol sa war on drugs ni Duterte nga adunay pag-abuso sa habig sa mga polis paghimo sa mga operasyon tungod kay nag-apas sa reward ug promosyon. — /IBM (BANAT NEWS)