Cable cars sunod nga alternatibong transportasyon
CEBU, Philippines — Mihangyo karon ang Cebu City Council ngadto sa Department of Transportation (DOTr) nga ikonsiderar ang cable car project isip intermodal public transport sa dakbayan paingon sa airport.
Usa ka resolusyon para niini ang gisang-at ni Konsehal Rey Gealon, kinsa mao usab ang Chairman sa Traffic Management Council (TMC) ug giaprobahan sa legislative body niadtong Miyerkules, Agosto 21, 2024.
Kaniadtong Agosto 12, 2024, ang DOTr pinaagi ni Secretary Jaime J. Bautista mipagawas og pamahayag nga kinahanglan tutokan ang pagpangita og haruhay ug luwas nga pampublikong transportasyon para sa mga ordinaryong pasahero.
Si Gealon nisang-at og resolusyon nga susama sa gipamahayag ni Bautista. Matud niya, niadtongAgosto 10, 2024 sa pakighinabi sa state broadcaster o PTV4, si Bautista miingon nga adunay mga interesadong mosud og public-private partnership para sa pagtukod og cable car system sa nasud.
Matud ni Gealon, ang mga cable cars makatabang sa pagpamenos sa kahuot sa trapiko sa mga urbanized cities pinaagi sa paghatag og “alternative mode of transportation” sa mga tawo.
"Since cable cars do not operate on streets, they do not contribute to overcrowding on city streets, which can reduce traffic congestion and also reduce carbon emissions and promoting sustainable urban development," matud pang Gealon. (BANAT NEWS)
- Latest
