Kapin P300 milyones gigahin sa Kapitolyo sa “Balik Eskwela” Program

CEBU, Philippines — Nagpagawas og kapin P300 milyones nga budget ang Kapitolyo sa programang "Balik Eskwela" nga nagtinguha nga makatabang sa mga tinun-an sa pag-abli sa klase karong tuiga.

Gilusad ang "Balik Eskwela" program dungan sa pag-abli sa Caravan of Government Services sa ikatulo nga kwarter karong tuiga didto sa lungsod sa Pinamungajan habagatang Sugbo niadtong Sabado, Agosto 10.

Si Gobernador Gwendolyn Garcia ug Congressman Pablo John "PJ" Garcis sa Tersero Distrito mao ang nangulo sa pagbukas sa maong programa. Ang mga tinun-an sa mga pampublikong tunghaan sa siyudad sa Toledo, ug mga lungsod sa Aloguinsan, Asturias, Balamban, Barili, Tuburan, ug Pinamungajan maoy unang nakadawat sa gipang hatag nga school supplies ug hygiene kits.

Lakip sa mga school supplies nga gipanghatag mao ang mga bag, folders, notebooks, lapis, ballpen, ruler, crayons, papel, erasers, ug school uniforms.

Nakadawat usab sila ug hygiene kits o "Health Eskwela Bags" nga dunay sulod nga toothpaste, toothbrush, shampoo, ug alcohol.

Gisiguro sa Kapitolyo nga ang mga bata dili lang andam sa akademikong kinahanglanon kundi apil sab ang ilang kahapsay ug kalimpyo.

Kuyog sa pag-abli sa maong programa ang mga miyembro sa Cebu Provincial Board nga sila si Atty. Jiembo Borgonia ug Victoria "Tata" Corominas-Toribio.

Niapil usab sila si Mayor Ana Jessica Baricuatro sa Pinamungajan, Mayor Marjorie Perales sa Toledo City, Mayor John-John Garcia sa Barili, Mayor Dana Andrew Dumdum sa Asturias, Bise Mayor Danny Diamante sa Tuburan, ug Bise Mayor Alfie Binghay sa Balamban. — /MEL (BANAT NEWS)